З заказніка на Алясцы прыбралі закінуты аўтобус, да якога ладзілі паломніцтвы вандроўнікі. Летась праз яго загінула беларуска
З заказніка на Алясцы прыбралі стары закінуты аўтобус, які пасля здымак фільма «У дзікіх умовах» стаў сапраўдным месцам паломніцтва для шукальнікаў прыгод, паведамляе Бі-Бі-Сі.
Улады прынялі гэтае рашэнне, каб не падстаўляць фанатаў фільма небяспецы: на шляху да гэтага месца вандроўнікі мусілі перайсці ўброд раку Тэкланіка, адметную імклівай плынню.
У ліпені 2019 года плынню знесла беларуску Ніку Ніканаву — жонку актывіста Пятра Маркелава. Пятру ўдалося выцягнуць яе з вады, але Ніка была ўжо мёртвая. Пара адправілася да закінутага аўтобуса падчас вясельнага падарожжа па Амерыцы.
Аўтобус стаў турыстычнай славутасцю пасля здымак фільма «У дзікіх умовах» (Into the Wild) з Эмілем Хірш у галоўнай ролі.
Клей Уокер, мэр акругі Дэналі, дзе знаходзіцца аднайменны нацыянальны парк, у інтэрв'ю агенцтву Рэйтэр назваў аўтобус «небяспечным атракцыёнам», а яго знікненне — «вялікай палёгкай».
Верталёт арміі ЗША ў пятніцу 19 чэрвеня падняў іржавую машыну ў паветра і перанёс у «бяспечнае месца», дзе яна пакуль будзе знаходзіцца.
Аўтобус, выпушчаны неўзабаве пасля вайны, у 1961 годзе кінулі будаўнікі ў лесе за 50 км ад бліжэйшага населенага пункта. Часам у ім начавалі мясцовыя паляўнічыя.
У 1992 годзе 24-гадовы амерыканскі студэнт Крыс Макэндлес аддаў усе свае грошы на дабрачыннасць, адправіўся адзін у нетры Аляскі, знайшоў аўтобус і пасяліўся ў ім, каб жыць удалечыні ад цывілізацыі ў гармоніі з прыродай.
Мяркуючы па запісах у дзённіку, Макэндлес правёў там 189 дзён. 6 верасня 1992 года выпадковы паляўнічы знайшоў у аўтобусе яго цела. Уцякач ад цывілізацыі памёр ад знясілення або памылкова з’еў атрутную расліну.
Жыццё і смерць Макэндлеса натхнілі пісьменніка Джона Кракаўэра на стварэнне кнігі Into the Wild («У дзікіх умовах»), па якой рэжысёр Шон Пэн зняў аднайменны фільм.
«Бульба» з Оршы пайшоў ваяваць за Расію — цяпер сястра шукае яго ці хаця б яго парэшткі9
Каментары