Карбалевіч: Нерэгістрацыя Бабарыкі — бясспрэчны знак слабасці Лукашэнкі
Лукашэнка махнуў рукой на вобраз моцнага палітыка, які не баіцца канкурэнцыі, піша на Svaboda.org палітычны аглядальнік Валер Карбалевіч.
Маўляў, Бабарыка не ўказаў даходаў, «нажытых злачынным шляхам». Гэтыя высновы ЦВК грунтаваліся на папярэдняй інфармацыі следчых органаў. Праігнаравалі прынцып прэзумпцыі невінаватасці: тое, што злачынства любога грамадзяніна можа прызнаць толькі суд.
Чытайце таксама: «Парушана прэзумпцыя невінаватасці», — юрыст Сапелка пра адмову рэгістраваць Бабарыку
А тое, што ўдзел супрацоўнікаў Белгазпрамбанка ў ініцыятыўнай групе Бабарыкі расцанілі як дапамогу замежнай структуры, увогуле ўвойдзе ў падручнікі юрыспрудэнцыі як прававы кур’ёз.
Уласна, сённяшняе рашэнне ЦВК цалкам вынікае з той стратэгіі, якую выбрала кіроўная каманда. З моманту арышту Бабарыкі іншага рашэння проста быць не магло.
Можна меркаваць, што пасля арышту Бабарыкі і інтэнсіўнай дыскрэдытацыі яго дзяржаўнымі медыя ягоная папулярнасць, наадварот, узрасла.
Бо запрацаваў чыннік сімпатыі да ахвяры ўладнага самавольства. То-бок эфект атрымаўся адваротны. У выніку — іншых варыянтаў, акрамя як выкінуць Бабарыку з выбарчага працэсу, у Лукашэнкі не засталося.
Быў, праўда, такі рызыкоўны варыянт: пакінуць Бабарыку ў бюлетэнях, а стаўку зрабіць на выбарчую машыну, якая за чвэрць стагоддзя навучылася даваць патрэбны вынік.
Але тут ёсць адна праблема. На пачатку кампаніі журналісты пыталі Віктара Бабарыку: маўляў, на што вы спадзеяцеся? Хіба не ведаеце, што ў Беларусі выбараў няма? Той адказаў, што калі мяне падтрымае 80%, то ўся выбарчая машына паламаецца і ЦВК будзе вымушана даваць рэальныя вынікі галасавання.
Лукашэнка спужаўся, што Бабарыка мае рацыю, і не стаў праводзіць такі эксперымэнт — ён вялікі перастрахоўшчык.
Якія высновы? Лукашэнка ахвяраваў вобразам моцнага палітыка, які не баіцца канкурэнцыі. Такі вобраз ён дэманстраваў раней. Цяпер уся гэтая інфармацыя пра рэйтынг у 76% — хлусня. Бо з такім рэйтынгам можна было б рэгістраваць усіх.
Чытайце таксама: Лукашэнку прыносяць сацыялогію, паводле якой узровень даверу яму — 76%
Цяпер мяняюцца і спосабы легітымацыі, і прырода палітычнага рэжыму, і шмат што іншае.
-
«Мне казалі: ты гаворыш як канадскі эмігрант». Сяргей Шупа расказаў пра Вільню 90-х, параўнанне літоўскай літаратуры з беларускай і адрозненні паміж народамі
-
Лукашэнка паводзіць сябе ў «макдональдсе» як у савецкай сталоўцы. І думае, што гэта крута
-
Пуцін ужо павіншаваў Маджтабу Хаменеі, а Лукашэнка не. Чаго чакае?
Цяпер чытаюць
Выхадцы з «Альфа» КДБ Беларусі займаюць кіраўнічыя пасады ў новым расійскім суперсакрэтным спецпадраздзяленні, прызначаным для забойстваў за мяжою23
Каментары