«За сістэматычнае парушэнне дысцыпліны». Звальняюць выкладчыцу, якая стварыла чат «БДУ 97%»
Святлана Волчак працавала на факультэце радыёфізікі і камп’ютарных тэхналогій БДУ з 2014 года. Але сёлета яе звальняюць. Святлана лічыць, што гэта звязана з яе палітычнай актыўнасцю, адміністрацыя універсітэта абвяргае.
«Сітуацыя такая, што ходзяць чуткі пра маё звальненне. Я ведаю, што мае калегі не маюць прэтэнзій да працы і паведамілі пра гэта адміністрацыі. Калегі пісалі хадайніцтва, якое падпісалі і загадчык кафедры, і дэкан — што я каштоўны супрацоўнік. Але кіраўніцтва сказала, што рашэнне ўжо прынятае, — распавяла «Нашай Ніве» Святлана Волчак. — На мой погляд, гэта звязана з тым, што я стварыла чат «БДУ 97%», збірала подпісы пад петыцыяй, насіла яе ў рэктарат, удзельнічала ў стварэнні страйкавага камітэту».
Святлану разам з мужам затрымлівалі ў Янаве, дзе яны былі на адпачынку. Нагодай стаў рэпост паведамлення аб пратэстным маршы. Гэта прызналі заклікам да незаконнага масавага мерапрыемства, міліцыя прыйшла ў дом, які здымала сямейная пара. І Святлана, і яе муж атрымалі па 15 сутак, сядзелі да 12 верасня.
«Пасля выхаду я прасіла калегу, каб мяне падмянілі ў панядзелак — нармальная практыка сярод выкладчыкаў. Пасля адміністрацыя БДУ папрасіла ў мяне тлумачэнні наконт двух тыдняў і таго панядзелка. Наконт двух тыдняў не было пытанняў, але замена ў панядзелак ім вельмі не спадабалася. У пятніцу я даведалася, што быў сход прафкамаў розных факультэтаў, ім зачыталі загад рэктара аб маім звальненні. Прафкамы вырашылі, што мая тлумачальная запіска не з’яўляецца апраўданнем, то-бок мяне варта звольніць, — кажа Святлана.
— Ходзяць чуткі, што мяне, хутчэй за ўсё, будуць звальняць па артыкуле, калі не звольнюся сама. Але сама пісаць заяву я не хачу прынцыпова.
Цяпер я хачу, каб рэктар праясніў сітуацыю, паказаў загад аб звальненні. Бо мяне пакуль нікуды не выклікалі, дакладна я нічога не ведаю».
У БДУ пацвердзілі — Святлану Волчак звальняюць. Заяву агучылі ў прэс-службе БДУ:
«Ва ўніверсітэце да ўсіх работнікаў аднолькавае стаўленне, якое рэгулюецца Працоўным кодэксам і калектыўнымі дамовамі. Па палітычных матывах нікога не звальняюць. Прычынай звальнення можа стаць сістэматычнае парушэнне працоўнай дысцыпліны.
У дачыненні Волчак Святланы завяршаецца працэдура скасавання працоўнай дамовы за парушэнне працоўнай дысцыпліны і неправядзенне заняткаў ужо пасля яе адміністратыўнага арышту. Просім усіх не накаляць сітуацыю і не шукаць сэнсы, якіх у гэтай сітуацыі няма».
Каментары