«Za sistematyčnaje parušeńnie dyscypliny». Zvalniajuć vykładčycu, jakaja stvaryła čat «BDU 97%»
Śviatłana Vołčak pracavała na fakultecie radyjofiziki i kampjutarnych technałohij BDU z 2014 hoda. Ale sioleta jaje zvalniajuć. Śviatłana ličyć, što heta źviazana ź jaje palityčnaj aktyŭnaściu, administracyja univiersiteta abviarhaje.
«Situacyja takaja, što chodziać čutki pra majo zvalnieńnie. Ja viedaju, što maje kalehi nie majuć pretenzij da pracy i paviedamili pra heta administracyi. Kalehi pisali chadajnictva, jakoje padpisali i zahadčyk kafiedry, i dekan — što ja kaštoŭny supracoŭnik. Ale kiraŭnictva skazała, što rašeńnie ŭžo pryniataje, — raspaviała «Našaj Nivie» Śviatłana Vołčak. — Na moj pohlad, heta źviazana z tym, što ja stvaryła čat «BDU 97%», źbirała podpisy pad pietycyjaj, nasiła jaje ŭ rektarat, udzielničała ŭ stvareńni strajkavaha kamitetu».
Śviatłanu razam z mužam zatrymlivali ŭ Janavie, dzie jany byli na adpačynku. Nahodaj staŭ repost paviedamleńnia ab pratestnym maršy. Heta pryznali zaklikam da niezakonnaha masavaha mierapryjemstva, milicyja pryjšła ŭ dom, jaki zdymała siamiejnaja para. I Śviatłana, i jaje muž atrymali pa 15 sutak, siadzieli da 12 vieraśnia.
«Paśla vychadu ja prasiła kalehu, kab mianie padmianili ŭ paniadziełak — narmalnaja praktyka siarod vykładčykaŭ. Paśla administracyja BDU paprasiła ŭ mianie tłumačeńni nakont dvuch tydniaŭ i taho paniadziełka. Nakont dvuch tydniaŭ nie było pytańniaŭ, ale zamiena ŭ paniadziełak im vielmi nie spadabałasia. U piatnicu ja daviedałasia, što byŭ schod prafkamaŭ roznych fakultetaŭ, im začytali zahad rektara ab maim zvalnieńni. Prafkamy vyrašyli, što maja tłumačalnaja zapiska nie źjaŭlajecca apraŭdańniem, to-bok mianie varta zvolnić, — kaža Śviatłana.
— Chodziać čutki, što mianie, chutčej za ŭsio, buduć zvalniać pa artykule, kali nie zvolniusia sama. Ale sama pisać zajavu ja nie chaču pryncypova.
Ciapier ja chaču, kab rektar prajaśniŭ situacyju, pakazaŭ zahad ab zvalnieńni. Bo mianie pakul nikudy nie vyklikali, dakładna ja ničoha nie viedaju».
U BDU paćvierdzili — Śviatłanu Vołčak zvalniajuć. Zajavu ahučyli ŭ pres-słužbie BDU:
«Va ŭniviersitecie da ŭsich rabotnikaŭ adnolkavaje staŭleńnie, jakoje rehulujecca Pracoŭnym kodeksam i kalektyŭnymi damovami. Pa palityčnych matyvach nikoha nie zvalniajuć. Pryčynaj zvalnieńnia moža stać sistematyčnaje parušeńnie pracoŭnaj dyscypliny.
U dačynieńni Vołčak Śviatłany zaviaršajecca pracedura skasavańnia pracoŭnaj damovy za parušeńnie pracoŭnaj dyscypliny i niepraviadzieńnie zaniatkaŭ užo paśla jaje administratyŭnaha aryštu. Prosim usich nie nakalać situacyju i nie šukać sensy, jakich u hetaj situacyi niama».
Kamientary