КДК прапануе такія змены ў падаткаабкладанне ІП, што лёс малога бізнэсу выглядае бязрадасна
У Сеціва трапілі прапановы КДК па «удасканальванні сістэмы падаткаабкладання ІП».
Так, КДК прапануе:
— Адмяніць адзіны падатак і замяніць яго спрошчанай сістэмай падаткаабкладання;
— Павысіць падаткі для ІП да 16% на юрыдычныя, бухгалтарскія, маркетынгавыя, кансультацыйныя, аўдытарскія «і іншыя» паслугі;
— Увесці 13% плату за зняцце гатоўкі звыш за тры тысячы рублёў у месяц (або звыш трох сярэдніх заробкаў па краіне);
— Узмацніць крымінальную адказнасць за падатковыя парушэнні;
— Павысіць адлічэнні ў ФСАН;
— Забараніць наяўныя плацяжы праз увядзенне дадатковых камісій за разлікова-касавае абслугоўванне.
Гэтыя прапановы пабачылі свет пасля абурэння Лукашэнкам ІПшнікамі і бізнэсам на «Усебеларускім народным сходзе».
Чытайце: НЭПу канец: 5 высноў з «Усебеларускага народнага сходу»
КДК кіруецца думкай, што большасць ІПшнікаў нібыта ў поўнай меры не нясуць «сацыяльных абавязкаў» перад дзяржавай, бо іх падатковы ўдзел мінімальны.
Пры гэтым, у існым законе ясна прапісана, што карыстацца спрошчанай сістэмай падаткаабкладання (а цяпер гэта 3% ці 5% ад супольнай выручкі ў залежнасці ад віду дзейнасці) можна толькі да дасягнення пэўнага памеру абаротаў, пасля якіх падаткаабкладанне павялічваецца.
КДК не прапануе знізіць гэты бар'ер, а прапануе адразу падняць падаткі для ўсіх, што ясна ўказвае на сапраўдныя прычыны і матывацыю новаўвядзенняў.
Кантралёры лічаць, што існая сістэма, нечакана, «дазваляе суб'ектам гаспадарання хутка ўзбагачацца за кошт плацяжоў насельніцтва і пры гэтым мець мінімальныя падатковыя абавязкі перад дзяржавай».
Месцамі КДК прамым тэкстам піша, што малы бізнэс у краіне варта знішчыць:
«Часткова [захады] дазволяць знізіць прывабнасць для ІП гэтых відаў дзейнасці і будуць спрыяць іх працаўладкаванню на штатную пасаду з выплатай ФСАН, а таксама зменшыць выгаду для суб'ектаў гаспадарання пры заключэнні разавых дамоваў для вываду сродкаў», — гаворыцца ў лісце з прапановамі.
Пакуль незразумела, як на прапановы рэагуе шырокая супольнасць індывідуальных прадпрымальнікаў.
Адзін з ІПшнікаў сказаў «Нашай Ніве» літаральна наступнае:
«Я супрацоўнічаю з ІТ-кампаніяй, якая мае юрыдычныя асобы па ўсім СНД. Плаціць 16% падатковай я не буду, мне прасцей адкрыць аналаг ІП у Расіі ці Украіне, і весці дзелавыя адносіны паміж замежнымі юрыдычнымі асобамі. У выніку, дзяржава не атрымае больш, яна не атрымае і таго, што мела ад маёй дзейнасці раней», — сказаў прадпрымальнік.
Цяпер чытаюць
«Людзі ідуць у мячэці, а не лечаць псіхічныя хваробы». Беларускі псіхіятр расказаў аб працы ва Узбекістане і ў Польшчы13
Каментары