Міжнародны распрацоўшчык і выдавец мабільных гульняў Playgendary ліквідуе ў Беларусі кампанію ТАА «Плейджэндары Девелопмент». Інфармацыя пра гэта з'явілася на сайце адзінага дзяржрэгістру (АДР). Па даных АДР, рашэнне прынятае 5 лютага ўласнікам, піша Dev.by.
Чуткі пра магчымае закрыццё мінскага офіса Playgendary з'явіліся яшчэ летам мінулага года. Тады па кампаніі прайшла хваля звальненняў. Прычым без працы апынуліся не толькі супрацоўнікі мінскага офіса, але і іншых лакацый.
Са слоў былых супрацоўнікаў кампаніі, яшчэ ў маі ім паведамілі, што могуць узнікнуць праблемы з пераводам грошай з-за мяжы на заробкі. Каб гэтага пазбегнуць, трэба было звольніцца з штату ў Мінску і падпісаць дыстанцыйна дагавор з кіпрскім офісам. Па выніку частку супрацоўнікаў, якія падпісалі такую дамову, нібыта на працягу кароткага перыяду часу звольнілі (называлася лічба — ад 150 да 200 чалавек).
У кампаніі не адмаўлялі, што былі звальненні, але заявілі, што адначасова альбо ў кароткі прамежак часу адразу 200 чалавек не звальнялі. На пытанне аб кіпрскай ракіроўцы прадстаўнік Playgendary тады коратка адказаў: «Няма сэнсу пераводзіць на Кіпр, а потым звальняць».
На днях у Playgendary зноў прайшлі звальненні, паведаміў dev.by адзін з чытачоў. Ён сцвярджае, што такое рашэнне кампаніі было нечаканым для супрацоўнікаў. Іншыя падрабязнасці расказаць адмовіўся.
У Беларусі ў кастрычніку 2021 года ў Playgendary працавала каля 120 чалавек. Да лета 2022 года, як сцвярджалі былыя супрацоўнікі, штат скараціўся да 40 чалавек
Каментары