У АБСЕ расіян і беларусаў-лукашэнкаўцаў пасадзілі на задворках, па-за алфавітам
Падчас пасяджэння Парламенцкай асамблеі АБСЕ расійскай дэлегацыі і дэлегацыі ад рэжыму Лукашэнкі дэманстратыўна выдзелілі месцы ў апошнім шэрагу, хоць звычайна пры рассадцы дзейнічае алфавітны парадак. Пра гэта паведаміў Офіс Святланы Ціханоўскай, дэлегацыя ад якога таксама гэтымі днямі прысутная ў Вене.
У зале ў першы, уступны дзень пасяджэння былі не ўсе дэлегацыі, а толькі частка — тыя, хто мусіў браць удзел у мерапрыемствах менавіта гэтага дня.
Падчас выступу расійскай дэлегацыі ў канцы сесіі большая частка прысутных пакінула залу ў знак пратэсту. Гэта былі ўдзельнікі дэлегацый дэмакратычных краін. Кіраўнік дэлегацыі ад Лукашэнкі Андрэй Савіных атрымаў слова ўжо пасля таго, калі ў зале не засталося амаль нікога.
У сваёй прамове Савіных паўтарыў звычайныя для расійскай і афіцыёзнай беларускай прапаганды хлуслівыя тэзісы пра адказнасць НАТА за вайну ва Украіне, апеляваў да Хельсінкскага дакумента, які нібыта Беларусь і Расія выконваюць, а заходнія краіны — не, і пужаў тым, што пасля выключэння з АБСЕ Расіі і лукашэнкаўскай Беларусі існаванне гэтай арганізацыі страціць сэнс.
Іншы прадстаўнік лукашыстаў, дэпутат ПП НС Сяргей Рачкоў, наракаў на тое, што: «Выступленні дакладчыкаў і нацыянальных парламенцкіх дэлегацый краін Захаду носяць аднабаковы антырасійскі характар. Парламентарыі гэтых краін не робяць крокаў па ўсталяванні аб'ектыўнага прафесійнага дыялогу па пытанні сітуацыі ва Украіне».
У той жа час Святлана Ціханоўская сёння прамаўляла перад дэлегатамі Парламенцкай асамблеі, якія сабраліся на спецыяльныя дэбаты, прысвечаныя правам чалавека ў Беларусі. Яны адбыліся ў Хофбургскім палацы адразу пасля пленарнай сесіі. Удзел у гэтым мерапрыемстве бралі 70 дэлегацый, суарганізатарамі выступілі Швецыя і ЗША.
Чытайце таксама:
У АБСЕ латвійскі дэлегат паслаў расійскую дэлегацыю за «расійскім вайсковым караблём»
«У санкцый не мусіць быць шчылін». Ціханоўская прапанавала ЕС стварыць адпаведную працоўную групу
Лукашэнкаўскім дэпутатам выдалі візы для ўдзелу ў пасяджэнні АБСЕ ў Вене
Цяпер чытаюць
У Беларусі зацвердзілі правілы эвакуацыі каштоўнасцяў на выпадак вайны: цэглу з Брэсцкай крэпасці з надпісамі будуць ратаваць перш за карціны Шагала і Суціна1414
Каментары