Міністр абароны Украіны расказаў, як Хрэнін у першы дзень вайны прапаноўваў яму капітуляцыю
Міністр абароны Беларусі Віктар Хрэнін прасіў свайго ўкраінскага калегу падпісаць акт аб капітуляцыі, каб спыніць вайну. Як расказаў у інтэрв'ю «Настоящему времени» Аляксей Рэзнікаў, размова адбылася ў другой палове дня 24 лютага 2022 года, яе пераказала «Люстэрка».
Кіраўнік Мінабароны Украіны Аляксей Рэзнікаў расказаў, што ў першы дзень вайны міністр Хрэнін выступаў як пасярэднік Шайгу і патэлефанаваў з прапановай аб капітуляцыі.
— Пасля абеду мне паступіў званок ад беларускага міністра з прапановай падпісаць акт капітуляцыі. Гэта было смешна.
— А як гэта гучала?
— Беларускі міністр запытаў размову. А мы з ім да гэтага размаўлялі, абмяркоўвалі рызыку і пагрозы, і ён мне клятвенна абяцаў, даваў слова афіцэра, што ніякага ўварвання з тэрыторыі Беларусі быць не можа. Ён парушыў гонар афіцэрскі, не выканаўшы свае абяцанні.
Я ўсё роўна прыняў званок, гэта было дзесьці пасля абеду. Ён гучаў вельмі няёмка, вельмі нязручна яму відавочна было. Ён кажа: «Я выконваю ролю пасярэдніка, хачу вам перадаць паведамленне ад міністра Шайгу, што ёсць прапанова падпісаць акт капітуляцыі, і тады ўсё можна будзе спыніць».
У мяне не было часу праводзіць якія-небудзь кансультацыі. Я проста адразу адрэагаваў (але без лаянкі сказаў!), я проста сказаў: «Дзякуй за вашу спробу выступіць нейкім перадатчыкам. Можаце перадаць у адказ, што я падпішу акт капітуляцыі з боку Расіі. І мы тады ўсю гэтую справу скончым».
Гэта быў наш адзіны віртуальны кантакт», — падзяліўся Рэзнікаў.
Цяпер чытаюць
Ездзілі шукаць нават у БССР, а неапазнанае цела 30 гадоў ляжала ў спецсховішчы. Новыя дэталі загадкавага знікнення ў ЗША беларускага пісьменніка Міколы Цэлеша22
Каментары