Прапагандыстка Надзея Сас расказала на СТБ, што прыехала ў Венгрыю зрабіць рэпартаж пра фонд Сораса, які згортвае сваю дзейнасць у Еўрасаюзе. Але ўлады Венгрыі не пусцілі ў краіну жанчыну. Яе спынілі ў аэрапорце, пратрымалі ноч у цэнтры часовага ўтрымання і адправілі ў Беларусь.
— Аказалася, што цяперашнія венгерскія ўлады насуперак сваёй афіцыйнай рыторыцы праект «Сас упаўнаважаны заявіць» баяцца больш, чым самога Сораса, якому ўезду ў Венгрыю не закрылі, — сказала Сас.
Яна распавяла, што ёй зрабілі «ўсялякія праверкі прама ў аэрапорце Будапешта, у выніку закрыўшы ўезд у Венгрыю і дэпартаваўшы».
Ноч перад дэпартацыяй яна правяла «ў суправаджэнні венгерскай паліцыі ў аэрапорце, у цэнтры часовага ўтрымання».
Прапагандыстка выказала меркаванне, што «венгерскія спецслужбы відавочна не без падказкі заакіянскіх куратараў зрабілі ўсё магчымае, каб сарваць падрыхтоўку» яе праграмы.
Надзея Сас з Украіны. Працавала на тэлеканалах Медзведчука.
Яна і яе муж Алег Валошын пераехалі з Украіны ў Беларусь у 2022 годзе, за 10 дзён да ўварвання расійскіх войскаў. Цяпер яна вядзе прапагандысцкае шоу на СТБ «Сас упаўнаважаны заявіць». Яе мужа, дэпутата Вярхоўнай рады Алега Валошына, на радзіме падазраюць у дзяржздрадзе.
Венгрыя — краіна ЕС, найбольш талерантная да палітыкі рэжымаў Расіі і Беларусі сярод еўрапейскіх краін.
Цяпер чытаюць
У пачатку 2000‑х трое настаўнікаў гісторыі збеглі ва Украіну ад «генацыду беларускага народа», які чыніў рэжым Лукашэнкі. Як склаўся іх лёс?6
Каментары