Мінімум два рэгіёны адмовіліся ўзнагародзіць сына Кадырава. У Крамлі наогул не ведаюць, што з гэтымі ўзнагародамі рабіць — Вёрстка
Як сцвярджае «Вёрстка», улады Кабардзіна-Балкарыі і Адыгеі не пагадзіліся выступіць у абарону Адама Кадырава пасля збіцця Мікіты Жураўля. Раней узнагароды сыну кіраўніка Чачні ўручылі ў Татарстане і Карачаева-Чаркесіі. Ініцыятыва з узнагароджаннем зыходзіць не ад Крамля, а ад чачэнскага кіраўніцтва, піша выданне.
Прадстаўнікі адміністрацыі чачэнскага кіраўніка Рамзана Кадырава звярталіся да ўладаў Кабардзіна-Балкарыі і Адыгеі з просьбай падтрымаць яго сына, Адама Кадырава.
Кіраўнікам гэтых рэгіёнаў прапаноўвалася ўручыць Кадыраву-малодшаму адну з нацыянальных узнагарод, «чым вышэй — тым лепш», распавяла выданню «Вёрстка» крыніца, блізкая да ўладаў Адыгеі.
Яе словы пацвердзіла крыніца ў парламенце, блізкая да ўладаў іншай каўказскай рэспублікі.
Па словах першай з іх, у адыгейскага кіраўніка Мурата Кумпілава «складанае становішча», таму што ён не хацеў бы адмаўляць чачэнскім уладам, але і ўвязвацца ў сітуацыю з Адамам Кадыравым не хоча.
Пасля скандалу са збіццём Мікіты Жураўля дэманстрацыя станоўчага стаўлення да сына кіраўніка Чачні можа быць «неадназначна ацэнена» федэральным цэнтрам, кажа суразмоўца.
«Ніякага канкрэтнага ўказання, як дзейнічаць у гэтых адносінах, рэгіяналам не далі, — падкрэсліў ён. — Таму ў рэгіёнах нервуюцца». У сувязі з гэтым кіраўнікі драбнейшых, у параўнанні з Чачнёй, суб'ектаў на Каўказе «самаўхіляюцца» ад удзелу ў гісторыі з Адамам Кадыравым «як толькі могуць», заявіла крыніца.
Паколькі тэма «складаная», то каментаваць яе прадстаўнікі каўказскіх уладаў звычайна не хочуць, пагадзіўся другі суразмоўца.
Абодва суразмоўцы сышліся ў тым, што Крэмль у сітуацыі з Кадыравым-малодшым і Жураўлём «маўчыць, але і не перашкаджае», і што ініцыятыва ўзнагароджання сына чачэнскага кіраўніка не зыходзіць ад Масквы. «Крэмль не хоча мець справы з гэтай бруднай, неадназначнай гісторыяй», — распавяла крыніца ў парламенце і падкрэсліла, што федэральнаму цэнтру «зусім не падабаецца» актыўнасць Рамзана Кадырава.
Аднак умешвацца ў адносіны кіраўнікоў рэгіёнаў і ў піяр патэнцыйнага пераемніка чачэнскага кіраўніка там не плануюць, кажуць суразмоўцы «Вёрсткі».
Суразмоўца «Вёрсткі», блізкі да Адміністрацыі прэзідэнта, кажа, што «інакш як трэш і гамон» уручэнне ўзнагарод Кадыраву-малодшаму «мала хто ўспрымае».
«Калі б нас нехта спытаў, ці можна гэта рабіць, адказам было б катэгарычнае «не», — заявіў ён. — Нельга распаўсюджваць спецыфіку аднаго ўсім вядомага сваёй спецыфічнасцю рэгіёна на ўсю краіну». Па словах крыніцы, «бяда ў тым», што раней пра тое, ці рабіць такія акцыі, рэгіёны пыталіся ў Адміністрацыі прэзідэнта. «З Адамам гэтага не адбылося», — адзначыў суразмоўца.
Кадыраў цяпер выступае першым з рэгіяналаў, хто актыўна спрабуе на трываласць межы дазволенага федэральнымі ўладамі, і высвятляецца, што яны сталі шырэйшымі, чым усе прывыклі думаць, адзначыла крыніца.
«Услед за Рамзанам ужо ідуць іншыя рэгіянальныя кіраўнікі, — дадаў ён. — Магчыма, мы бачым фармаванне першага рэгіянальнага альянсу. Калі ў іх гэта атрымаецца, дакладна з'явяцца і іншыя».
25 кастрычніка 15-гадовы сын Рамзана Кадырава Адам быў узнагароджаны ордэнамі Татарстана «Дуслык» і Карачаева-Чаркесіі — «За заслугі перад рэспублікай». У Чачні сын Рамзана Кадырава атрымаў атрымаў званне Героя Рэспублікі.
Адам Кадыраў стаў шырока вядомы пасля таго, як збіў у СІЗА зняволенага Мікіту Жураўля, арыштаванага за спаленне Карана. Па расійскіх законах, гэта зʼяўляецца крымінальным злачынствам. Прадстаўнік Крамля Дзмітрый Пяскоў адмовіўся даваць каментары на гэты конт.
Цяпер чытаюць
На фронце загінуў сын экс-кандыдата ў прэзідэнты Дзмітрыя Уса. Іван ваяваў за Расію18
Каментары