«Называў халяўшчыцай і раіў кантраляваць лібіда». Дзяўчаты падзяліліся гісторыямі сваіх найгоршых Tinder-спатканняў
Сэрвісы для знаёмстваў падобныя да рулеткі: хтосьці знаходзіць там сваё каханне, а хтосьці абмяжоўваецца выключна «прыгодамі». Нашы гераіні падзяліліся сваім досведам пошуку партнёра ў Tinder.
Света, 29 гадоў: «Хацеў, каб мае сябры аплацілі яго будоўлю»
Аляксей здаваўся простым гаспадарлівым хлопцам: да моманту нашай сустрэчы ён ужо дабудаваў кватэру ў «Новай Баравой» і пачаў узводзіць дом у Валожыне. Пасля некалькіх спатканняў ён прапанаваў з'ехацца, але не ў гатовую кватэру, а ў той дом, які ўяўляў сабой голую «скрынку» без якога-небудзь аздаблення. Я не пагадзілася, але сама прапанова мяне цешыла — я думала, што гэта паказчык яго сур'ёзных намераў.
У хуткім часе хлопец пачаў даведвацца, ці ёсць у мяне зберажэнні і колькі зарабляюць мае сябры. Слова за слова, і Аляксей кажа: «Давай ты возьмеш у доўг у сяброў, каб я скончыў тут рамонт. Уяві, як мы шчасліва зажывем у гэтым доме». Добра, што мне хапіла мазгоў зразумець, што гэта — схема разводу на грошы, і сысці. Але я часта думаю, ці знайшоў ён дурнічку, якая на гэта пагадзілася.
Карына, 30 гадоў: «Хлопец заплаціў за ўваход, але потым перадумаў»
Улетку, калі была спякота, хлопец з Тындара запрасіў мяне ў аквапарк. Прыехалі: на ўваходзе ён прапанаваў за мяне заплаціць — я пагадзілася. Білет каштаваў рублёў 25 і пакрываў поўны дзень.
Мы распрануліся, занялі лежакі. І тут пачалося: ён то цягнуў мяне ў ваду, то настойліва прапаноўваў намазаць спіну сонцаахоўным крэмам. А хвілін праз 20-30 нечакана выдаў пытанне: «Як я табе?». Я разгубілася і сказала, што нейкія высновы рабіць рана, бо мы толькі пазнаёміліся і яшчэ толкам не паспелі пазнаць адно аднаго.
Такі адказ яго расчараваў. Хлопец сказаў, што калі ён мне перашкаджае, то можа адсунуць свой ляжак у іншае месца. А падумаўшы крыху, дадаў: «Вярні мне грошы за ўваход. Думаю, так будзе сумленна». З першапачатковай сумы ён забраў 20 рублёў, а астатнія пяць пакінуў як плату за карыстанне маёй сонцаахоўкай — такі высокародны мужчына аказаўся.
Вольга, 25 гадоў: «Называў жанчын халяўшчыцамі»
Майго спадарожніка звалі Віктар. Хлопцу нядаўна споўнілася 33 гады, у яго была свая кватэра і сабака: здавалася, вось ён — нармальны дарослы мужчына. З перапіскі я даведалася, што Віця ў разводзе, але ў душу не лезла і аб прычынах разыходу не пыталася.
Мы сустрэліся ў кавярні і адразу ж пачаліся «званочкі». То ён гневаўся на тое, што цяпер таты гуляюць з каляскамі, хоць гэта не «мужчынская справа», то вельмі нязграбна спрабаваў навязаць мне сэкс. Калі зразумеў, што яму сёння нічога не свеціць, пачаў злавацца і зваць усіх жанчын халяўшчыцамі. Увогуле, мне хутка стала зразумела, у чым сапраўдная прычына яго разводу.
Ірына, 24 гады: «Усе жанчыны здраджваюць»
Неяк я пагадзілася на спатканне з Ігарам — разведзеным журналістам. Па перапісцы здавалася, што ён спрэс прагрэсіўны малады чалавек, але інтуіцыя ўсё роўна казала, што нешта з гэтым хлопцам не так. І яна мяне не падвяла.
Аказалася, хлопец свята верыць, што абсалютна ўсе жанчыны здраджваюць, бо гэта «ў нашай прыродзе». Таму, паводле яго слоў, мужчыне трэба кантраляваць сваю даму і агароджваць яе ад сустрэч з сяброўкамі — «для бяспекі істоты, якая не можа ўтрымаць сваё лібіда». Гэта, калі што, яго прамая цытата.
Пасля такіх адкрыццяў дальнейшы спіч пра тое, што жанчына павінна сустракаць мужа з пірагамі, здаваўся проста дзіцячым лепетам. Пасля гэтага Тындарам я больш не карысталася. Але цяпер мне дзіўна, што гэта мужчыны скардзяцца, што нармальных дзяўчат няма.
Наташа, 36 гадоў: «Ён проста шукаў бясплатную няню»
Да таго, што большасць маіх знаёмых з Тындара ў разводзе, я стаўлюся нармальна — усё ж такі нам не па 17 гадоў. Тое, што ў шматлікіх мужчын ад папярэдніх шлюбаў засталіся дзеці, таксама цалкам натуральна. Таму, калі мяне паклікаў на спатканне Алег — «нядзельны» тата двух дзяцей-падлеткаў, я без задняй думкі пагадзілася.
На сустрэчы ён шмат пытаўся, ці люблю я дзяцей, ці хутка знаходжу агульную мову з імі. Першапачаткова мне гэта падабалася — у гэтыя моманты ён здаваўся такім ідэальным клапатлівым бацькам. Праз тры спатканні ён прапанаваў правесці выхадныя разам з яго дзецьмі: маўляў, нам усім час пазнаёміцца. Я хвалявалася, але пагадзілася.
Калі прыйшла да яго, ён прадставіў мяне нашчадкам, а потым зазбіраўся ў гараж — проста кінуўшы мяне з імі. Аказалася, яму не было з кім пакінуць сыноў, а знайсці «сядзелку» праз дадатак для знаёмстваў здалося яму самым простым і надзейным варыянтам.
Той дзень я правяла з яго дзецьмі — яны ж не вінаватыя, што іх бацька мудак. Але пазней, у гэты ж вечар, я заблакавала яго кантакт.
***
Зрэшты, не шанцуе на спатканнях не толькі жанчынам. Хлопцы таксама расказалі пра свае трэшовыя сустрэчы.
Чытайце таксама:
Tinder пакідае Беларусь. І дату абраў паказальную
Не толькі Tinder. Дзе цяпер шукаць пару — на ўсё жыццё і на адну ноч
Цяпер чытаюць
На аўташоу ў Лідзе ледзь не загінуў адзін з самых знакамітых каскадзёраў Беларусі — яго відэа сабралі амаль паўмільярда праглядаў. Што з ім цяпер?4
Каментары