У Польшчы з'явіўся новы музычны беларускі калектыў — Olia Shnip Band. Аўтары праекта — Вольга Шніп і яе муж, былы палітвязень і музыка гурту Irdorath Антон Шніп.
Стваральнік «Дома творцаў» Сяржук Доўгушаў расказаў Свабодзе, што мэта праекту — падтрымаць рэпрэсаваных беларусаў, дапамагчы ім. Па-першае, псіхалагічна рэабілітавацца, а па-другое — рэалізавацца творча. У выніку працы восьмай рэзідэнцыі і зʼявіўся новы музычны калектыў — Olia Shnip Band.
«Мы праводзім конкурс заявак, адбіраем менавіта рэпрэсаваных творчых асобаў. У восьмую па ліку рэзідэнцыю мы запрасілі менавіта аркестравых музыкантаў (струнныя, духавыя інструменты). Хтосьці раней працаваў у філармоніі, хтосьці ў оперным тэатры, хтосьці ў аркестры цырку, ёсць дзяўчына з Украіны.
Ідэя стварэння новага калектыву належыць Вользе і Антону Шніпам. На сцэне адначасова будуць 20 музыкаў. Гэта Варшаўскі вольны аркестр (Warsaw Freedom Orchestra) і гурт з шасці беларусаў.
На канцэрце будуць гучаць і соўл, і джаз, і госпэл (жанр духоўнай хрысціянскай музыкі), і фолк. На апошняй рэпетыцыі я пераканаўся, што гледачоў чакае штосьці буйное, неймавернае і грандыёзнае», — прызнаецца Доўгушаў.
«Святло і надзея»
Мультыінструменталіста, саўндпрадзюсара Антона Шніпа затрымалі 2 жніўня 2021 году разам з іншымі музыкамі фэнтэзі-фолк-гурта Irdorath (Надзеяй і Уладзімірам Калачамі, Пятром і Юліяй Марчанкамі) на лецішчы пад Менскам. У «аперацыі» ўдзельнічалі ўзброеныя байцы САХР і міліцыя.
Ягонай жонкі Вольгі цудам там не было — паехала раней павіншаваць бацьку з днём народзінаў. У снежні 2021 года Антона Шніпа асудзілі на паўтара года калоніі. Тэрмін ён адбываў у адной з самых жорсткіх папраўчых установаў — у Наваполацкай калоніі № 1. Там яму ўдалося сустрэцца з Віктарам Бабарыкам. Калі Антон вызваліўся, яны з Вольгай пераехалі ў Польшчу.
Вольга Шніп — оперная спявачка і кампазітарка. Займаецца музыкай з 6 гадоў, свой першы альбом запісала ў 11. Потым было шмат супольных праектаў з мужам.
«З астатнімі музыкамі мы пазнаёміліся ў Польшчы ў Доме творцаў. У кожнага былі свае ўласныя праекты: адзін працаваў у аркестры цырка, другі піяністам у аркестры тэатру оперы і балету, трэці — круты джазмэн, чацвёрты — у праектах цяжкай музыкі, чацвёрты — у фолк-бэндах. У кожнага вялікі досвед.
Падчас рэзідэнцыі мы стварылі такі бэнд: два клавішнікі (кожны са сваімі «прымочкамі«), бас-гітара, бубны, вакал). Да нас далучыліся музыкі з Варшаўскага вольнага аркестра — мы распісалі для іх партытуры). Уся музыка майго аўтарства: мы не абмяжоўваемся адным жанрам, лічым, што гэта арт-поп: туды ўваходзіць джаз, опера, рок-музыка — на любы густ.
Мы не бачым сябе ў агрэсіўнай барацьбе, мы хочам паказаць сваёй музыкай людзям святло, надзею, што трэба рухацца наперад», — дзеліцца Вольга Шніп.
Першы канцэрт Olia Shnip Band адбудзецца 18 студзеня ў Варшаве на вуліцы Pulawska, 114.
Цяпер чытаюць
Сёстры Груздзевы драматычна расказалі, як іх выкінуў за дзверы міністр культуры Руслан Чарнецкі. «Як сабак»16
Каментары