«Больш хацелася плюнуць у твар». Экс-палітзняволеная распавяла пра фатаграфаванне ў калоніі ў Міжнародны дзень абароны дзяцей
У праекце «Магшоты палітвязняў» беларусы і беларускі дзеляцца гісторыямі, як іх фатаграфавалі ў месцах няволі. Фігурантка «справы студэнтаў» Яна Арабейка таксама распавяла пра тое, як яе фатаграфавалі ў жаночай калоніі 1 чэрвеня.
Фота ў рамачцы са звярком і подпісам «С Днём детства» абяцалі адправіць бацькам. Яна Арабейка прабыла ў жаночай калоніі №4 адзін год і адзін месяц. Яна падзялілася гісторыяй, якая з ёй адбылася там 1 чэрвеня 2022 года:
«У калоніі быў конкурс на лепшы асфальтавы малюнак. У нас у атрадзе перапалох. Прыйшла новая маладая загадчыца гаспадаркі, якой не ўсе былі рады. Жанчына, якая была адказная за насценгазеты нашага атрада, павінна была ўдзельнічаць у гэтым конкурсе. Яна нават намалявала эскіз. Але ў апошні момант адмовілася. Тады папрасілі мяне. Памятаю, што я не вельмі хацела. Але дзеля новай загадчыцы гаспадаркі, якая здавалася адэкватнай, пагадзілася.
Па-мойму, я малявала нейкае сонца на арэлях. Не ведаю, прычым тут дзень дзяцінства… У нейкі момант прыйшла культарганізатарка з фотаапаратам і тая ж відэаграфка, што фоткала нас на бірку.
Яны абвясцілі, што нас сфатаграфуюць і выдадуць нам фота, а мы зможам іх адправіць бацькам. Мяне сфатаграфавалі — зноў на відэакамеру. Я памятаю, як яны прасілі мяне ўсміхацца. Але мне вельмі не хацелася — больш хацелася плюнуць ім у твар.
Фота і праўда зрабілі. Хоць я ў гэта не верыла. Там я была ў мятай форме, а па крузе — дурная рамачка і нейкі звярок у вуглу. І подпіс: «С Днём детства». Гэта было вельмі смешна. Нібы вельмі іранічны мем. Я нават змагла паказаць фота маме на спатканні.
І я верыла, што фота не забяруць пры вызваленні. Яны ж самі яго мне далі. І самі прапаноўвалі яго адправіць дадому. Але фота забралі. Вялікая страта. Затое вельмі смешная гісторыя».
Позна ўвечары Лукашэнка паразмаўляў яшчэ і з Джонам Коўлам. Імаверна, гаворка ішла пра ўмовы і тэрміны вызвалення палітвязняў2
Каментары