Кіраўнік МУС Эстоніі прапанаваў прызнаць РПЦ тэрарыстычнай арганізацыяй
Каб забараніць дзейнасць Маскоўскага патрыярхата на тэрыторыі краіны.
Міністр унутраных спраў Лаўры Ляэнеметс заявіў, што мае намер прапанаваць Рыйгікогу (парламенту краіны) прызнаць Маскоўскі патрыярхат тэрарыстычнай арганізацыяй, каб забараніць яго дзейнасць у Эстоніі, паведамляе Postimees.ee.
Прадстаўнік Эстонскай праваслаўнай царквы Маскоўскага патрыярхату (ЭПЦ МП) заявіў у аўторак, што яны не знаходзяцца ў прамым падначаленні маскоўскага патрыярха і не могуць несці адказнасць за выказванні ў падтрымку вайны Расіі супраць Украіны, якія гучаць у Маскве. Тым самым мясцовая царква, па сутнасці, адкінула патрабаванне Ляэнеметса выйсці з падпарадкавання патрыярха Кірыла.
Па словах Лаўры Ляэнеметса, грунтуючыся на экспертызе МУС і ацэнцы паліцыі бяспекі, у яго як у міністра ўнутраных спраў не застаецца іншага выбару, акрамя як самому прыняць меры для разрыву сувязяў паміж ЭПЦ МП і маскоўскім патрыярхам.
«З улікам наяўнага кантэксту, у мяне як у міністра ўнутраных спраў, няма іншага выбару, акрамя як прапанаваць Рыйгікогу абвясціць Маскоўскі патрыярхат тэрарыстычным, які падтрымлівае тэрарызм ў сваёй дзейнасці. Міністр унутраных спраў зможа звярнуцца ў суд і прапанаваць спыніць дзейнасць дзейнай тут царкоўнай арганізацыі.
Гэта не паўплывае на вернікаў, гэта не азначае, што храмы будуць зачыненыя, але гэта азначае, што сувязі з Масквой будуць разарваныя», — сказаў міністр.
«Мы павінны разумець, што сёння Маскоўскі патрыярхат падпарадкоўваецца Уладзіміру Пуціну, які, па сутнасці, кіруе тэрарыстычнай дзейнасцю ў свеце», — дадаў ён.
Па словах Ляэнеметса, Рыйгікогу ўжо прымаў такую заяву і аб'яўляў Расію тэрарыстычнай дзяржавай.
Па словах Ляэнеметса, за два гады знаходжання на пасадзе міністра ўнутраных спраў яму давялося чатыры разы выклікаць прадстаўнікоў ЭПЦ МП па пытаннях бяспекі. Аднак заява, прынятая Саборам РПЦ у красавіку (маліцца аб перамозе ў вайне супраць Украіны), вывела сітуацыю з бяспекай на новы ўзровень.
Цяпер чытаюць
На вайне ва Украіне загінуў былы дырэктар двух аршанскіх заводаў4
Каментары