Блогер Шабуцкі абараняе сцяг СССР: Ветэраны лічаць яго сцягам перамогі
Блогер і экс-баец палка Каліноўскага Максім Шабуцкі і цяперашні баец Аляксандр «Лахвіч» Наўковіч у эфіры «Еўрарадыё» выказаліся пра выкарыстанне сцяга СССР.
Падчас размовы ў студыі «Еўрарадыё» закранулі тое, што блогер Максім Шабуцкі ў сваіх эфірах выкарыстоўвае сцяг СССР.
На погляд самога блогера, чырвоны сцяг звязаны з перамогай у Вялікай Айчыннай вайне, а сёння на геапалітычнай арэне адбылася манапалізацыя гэтай падзеі Расіяй.
«Было б карэктней пачакаць да таго адрэзку, калі памрэ апошні ветэран, які сапраўды лічыць яго сцягам перамогі. <…> Гэтыя людзі прайшлі вайну»,
— гаворыць блогер і сцвярджае, што памятае, як «не адзін раз у Беларусі калі [ветэранам] задавалі пытанне, што [азначае] для вас гэты сцяг, яны гаварылі, што для іх гэта сцяг перамогі».
На погляд Шабуцкага, тое, што сёння пад чырвоным сцягам ва Украіне здзяйсняюцца злачынствы, нельга змешваць з мінулым.
«Чыста з чалавечых катэгорый, пакіньце гэтых ветэранаў, дайце ім дажыць. Будзем мы новую краіну з новымі сцягамі будаваць. Пакіньце гісторыю гісторыкам. Замест таго, каб ладзіць дыскусіі пра сцягі, лепш рабіць канструктыўную працу».
У сваю чаргу Аляксандр Наўковіч заўважыў, што выкарыстанне Шабуцкім у сваіх відэа чырвонага сцяга тлумачыцца тым, што ён працуе на розную аўдыторыю. Самому ж Наўковічу чырвоны сцяг не падабаецца. Але, як заўважае баец, ён можа падабацца іншым. Напрыклад, беларускай арміі, за якую ў 2020-м годзе таксама ішло змаганне.
«Падабаецца, не падабаецца, гэта не важна. Трэба проста чуць тыя думкі, якія табе даносіць чалавек», — адзначае «Лахвіч».
Каментары
А Шабуцкі - прынцыпова рускамоўны савок.