Журавіны ў цукры, грыльяж і згушчонка. Беларуска адшукала айчынныя прадукты на варшаўскім рынку
Беларуска Настасся адшукала беларускія тавары на варшаўскім рынку Bazar Olimpia. Аказалася, у польскай сталіцы можна купіць рагачоўскую згушчонку, журавіны ў цукры і нават цукеркі грыльяж. Валодае гандлёвым пунктам сям'я з Украіны. Пра ўдалую куплю дзяўчына расказала некалькі тыдняў таму ў інстаграме, піша Most.
Настасся расказаае, што на рынку ёсць усё, а цэны на многія тавары значна ніжэйшыя, чым у крамах. Але гандлёвыя месцы ўяўляюць сабой, мяркуючы па відэа, пераважна раскладныя сталы пад адкрытым небам або пад навесамі. Частка асартыменту раскладзеная проста на зямлі.
«Сюды трэба прыехаць хаця б для таго, каб адчуць вайб дзевяностых», — гаворыць дзяўчына.
Абышоўшы прылаўкі з прадуктамі харчавання, адзеннем, абуткам і іншым шырспажывам (тут, на думку дзяўчыны, «можна сабраць чалавека па частках»), Настасся знайшла столік з беларускімі і ўкраінскімі прадуктамі — ён стаіць каля плота з сеткі.
Сярод беларускіх тавараў — зефір, пасціла, халва, цукеркі і нават алкаголь. Цэны, вядома, вышэйшыя, чым у Беларусі, але, са слоў Анастасіі, не крытычна.
«Для тых, хто не можа з'ездзіць дадому (каб не выенчваць гэтую бляшанку згушчонкі ў знаёмых), гэты пункт на рынку проста знаходка», — кажа дзяўчына.
Прыязджаць на рынак Настасся рэкамендуе па нядзелях. Рынак адкрыты з 06:00 да 15:00, але дзяўчына папярэджвае, што ўжо да 13:00 некаторыя прадаўцы пачынаюць складаць тавар, таму раіць прыязджаць з раніцы.
Меркаванні каментатараў падзяліліся. Многія зацікавіліся месцам. Іншыя ж мяркуюць, што рынак у такім выглядзе — ганьба для польскай сталіцы, цэны на беларускія тавары завышаныя, а купцам раяць уважліва сачыць за тэрмінамі прыдатнасці прадуктаў харчавання.
Сусветная зорка Джэйсан Дэрула заехаў у Беларусь. Прэм’ер Турчын вадзіў яго па Доме ўрада8
Каментары