Грабоўскі: У «Манрэалі» я не бухаў, таму быў асобна ад братоў Касціцыных

Экс-форвард расказаў, што падчас выступаў за «Манрэаль» (2006—2008) не ўжываў спіртнога, у сувязі з чым яму было складана знайсці агульную мову з братамі Касціцынымі, калі яны выступалі за гэты клуб.

«Мы з Сяргеем Касціцыным ваявалі толькі тады, калі я супраць «Манрэаля» гуляў [у складзе «Таронта»], а ён — супраць «Таронта». Я ж няўступлівы. (…) Я не быў у іх тусоўцы. Яны тусаваліся з Кавалёвым і Маркавым (расійскія хакеісты «Манрэаля» — НН), а я быў трошкі асобна, бо не бухаў, быў яшчэ маладым.

Думаю, ва ўсім быў вінаваты трэнер, які не стварыў патрэбную атмасферу. Была не каманда, а ўбоства: чэхі асобна, амерыканцы — асобна, і гэтак далей. Усе паасобку есці хадзілі. Гэта не каманда. Я гарачыўся таксама. Ну, вось і папрасіў абмену з «Манрэаля», — сказаў Грабоўскі (перайшоў у «Таронта» — НН).

Таксама Грабоўскі, які вярнуўся з Мінска ў Канаду, распавёў, што хоча быць трэнерам у Нацыянальнай хакейнай лізе.

«Паставіў сабе такую задачу: хачу быць трэнерам. Мне гэта падабаецца, я блізка да хакея. Але цяпер я проста не магу. Мне трэба набірацца вопыту. Калі растуць дзеці, ім хочацца дапамагчы. Вось летась я трэніраваў свайго малодшага, 7-гадовага. Спачатку думаў, што я не змагу гэтага рабіць, што гэта вельмі цяжка… але неяк я змог, мне гэта спадабалася.

… Хочацца быць трэнерам. Галоўным, не галоўным — проста быць у хакеі. Гэта асноўная мэта. І набірацца досведу. Я ў Канадзе, бо [тут] хакей — number one. І дзе яшчэ можна досведу набраць, як не ў Канадзе? Кантакты ў Таронта, я ўвесь час хаджу і гляджу на трэніроўкі — гэта каласальны вопыт. А ў далейшым — паглядзім, як лёс [распарадзіцца].

Хочацца папрацаваць у НХЛ. Скажу праўду: хочацца папрацаваць галоўным трэнерам менавіта ў НХЛ. Гэта вяршыня. Ёсць прыклад трэнера Ягора Шаранговіча (сённяшні беларускі гулец у «Калгары» — НН), які [быў] у «Калгары», а цяпер будзе працаваць у «Таронта». Ён трэніраваў «Віндзар» (у OHL — мінорная хакейная ліга штата Антарыа), дзе будзе [гуляць Ілля] Протас, потым пайшоў у «Калгары», а цяпер — у «Таронта». Трэба працаваць — проста так цябе не возьмуць. Трэба ўмець з камп'ютарам працаваць, з усімі праграмамі. Тады зможаш быць трэнерам», — сказаў Грабоўскі.

Міхаіл Грабоўскі гуляў у Нацыянальнай хакейнай лізе з 2006 па 2018 год. За «Манрэаль Канадыенс» ён выступаў з 2006 па 2008 год, а затым перайшоў у «Таронта», за гэты клуб ён правёў пяць сезонаў. Потым выступаў у «Вашынгтоне», «Нью-Ёрк Айлендэрс» і «Вегас Голдэн Найтс».

• 2
• 0
• 5
• 2
• 0
• 0
• 0
• 0