З сядзібы Пуслоўскіх у Слоніме зніклі скульптуры львоў. Што адбываецца?
У жніўні ў сядзібе Пуслоўскіх у Слоніме пачаўся рамонт. Ужо паспелі зняць стары асфальт перад будынкам, таксама паставілі будаўнічыя рыштаванні. У верасні слонімцы заўважылі, што знікла візітная картка сядзібы — скульптуры львоў, якія знаходзіліся каля ўваходу, піша Hrodna.life.
Скульптуры «абяцалі вярнуць»
Будаўнічую пляцоўку каля сядзібы абгарадзілі, а на ўчастку з’явіліся будматэрыялы. Дэмантавалі стары асфальт перад будынкам. У жніўні пачалі аднаўляць дах, таксама планавалі пафарбаваць фасады.
У верасні гараджане заўважылі, што скульптуры львоў «кудысьці перамясцілі, але абяцалі вярнуць». Вазы, што знаходзяцца побач з ільвамі, пакуль застаюцца на месцы.
Што з’явіцца ў будынку пасля рэканструкцыі — пакуль невядома. Чытачы тэлеграм-канала выказваюць меркаванні, што сядзібу Пуслоўскіх пераробяць пад ЗАГС.
Сядзіба атрымала статус гісторыка-культурнай каштоўнасці толькі год таму
У 2023 годзе сядзібе надалі статус гісторыка-культурнай каштоўнасці другога тыпу. Згодна з ім, цяпер на тэрыторыі зоны аховы забаронена праводзіць рамонтна-рэстаўрацыйныя работы без узгаднення, высякаць дрэвы і размяшчаць вонкавую рэкламу, якая шкодзіць візуальнаму ўспрыманню гістарычнай каштоўнасці.
Тады ж скульптурны ансамбль ільвоў і вазаў узялі пад асобую ахову.
Гісторыя сядзібы «Альбярцін»
Палацава-паркавы ансамбль Пуслоўскіх «Альбярцін» — помнік сядзібна-паркавай архітэктуры ў стылі позняга класіцызму. Знаходзіцца ў Слоніме на беразе ракі Іса. З’явіўся ў першай палове XIX стагоддзя як рэзідэнцыя слонімскага павятовага маршалка Войцеха Пуслоўскага. Сядзіба і возера названыя ў гонар аднаго з яго сыноў. Аўтарам ільвоў каля ўвахода лічыцца італьянскі скульптар Антоніа Канова.
Сядзіба «Альбярцін» і прылеглы да яе парк захаваліся амаль без змен. У савецкі час у палацы размяшчалася бальніца, да пачатку рамонту — Дом культуры, моладзевы цэнтр і гарадская бібліятэка. У флігелі размяшчаецца фізкультурна-спартыўны клуб папяровай фабрыкі «Альбярцін».
У захаваным будынку стайняў, які раней прадавалі з аўкцыёну, у лістападзе 2022 адкрыўся гатэль, рэстаран і SPA-комплекс «У Пуслоўскіх».
Цана былой каралеўскай рэзідэнцыі ў Гродне за два месяцы ўпала ў два разы. Ніхто не хоча купляць
«Мы ўдыхнулі новае жыццё ў гэта месца». На Валожыншчыне сям'я ратуе рэдкіх коней і стогадовы сад
Падарожжа па вузкакалейцы, сафары, гранітныя скалы… Топ-8 незвычайных тураў па Беларусі на выхадныя
Ураган зламаў унікальнае дрэва ў Жамыслаўскім парку. Што цяпер з ім будзе?
Цяпер чытаюць
Аляксандр Надсан першы раз прыехаў у Беларусь пасля сарака гадоў эміграцыі. Мінская моладзь нечакана знайшла ў ім тое, чаго не бачыла ў сваіх бацьках88
Каментары