Чалы: Для Лукашэнкі аднолькава дрэнныя і перамога Расіі, і перамога Украіны. Ён хацеў бы нічыёй

У новым выпуску праграмы «Навіны з Чалым» эканаміст Сяргей Чалы звярнуў увагу на тое, што Лукашэнка з новай сілай загаварыў пра небяспеку эскалацыі.

На сустрэчы са студэнтамі Лінгвістычнага ўніверсітэта Лукашэнка заявіў:

«Я не хачу вайны на сваёй зямлі. Але, на жаль, эскалацыя працягваецца. Як мне сябе ў гэтай сітуацыі паводзіць? Улезці ў гэта ні ў якім разе нельга. А калі пачнецца сутыкненне з НАТА, нам таксама будзе няпроста.

Не хацелася б, каб вайна была на нашай тэрыторыі, каб нечыя інтарэсы вырашаліся тут, за наш кошт».

Чалы заўважае, што ў абодвух выпадках магчымай эскалацыі, якія згадаў Лукашэнка, яна паходзіць з боку Расіі.

«Для Лукашэнкі аднолькава дрэнны любы вынік расійска-ўкраінскай вайны. Ці перамога Украіны, ці перамога Расіі. Падобна, менавіта таму Лукашэнка ў апошні час пачаў гаварыць аб тым, што было б нядрэнна, каб «манетка на рабро ўпала» — каб вайна скончылася нейкай нічыёй», —

выказвае сваю думку Чалы і спасылаецца на словы Лукашэнкі на другой Мінскай міжнароднай канферэнцыі па еўразійскай бяспецы.

«Апошнія мае кантакты з разумнымі прадстаўнікамі «цывілізаванага Захаду» сведчаць пра тое, што ў нас пазначыўся пэўны крэн. Захад нарэшце зразумеў, што трэба дамаўляцца ва Украіне.

Магчыма быць нічыёй, калі сёння. Я так па-спартыўнаму гавару».

Чалы лічыць, што нічыя — адзіная надзея для Лукашэнкі пазбегнуць міжнароднай ізаляцыі ў статусе ізгоя. І менавіта на гэта разлічана вызваленне некаторай колькасці палітвязняў.

Аналітык заўважае, што калі нехта і зразумеў правільна пасыл Лукашэнкі, то гэта была сама Расія. У выніку дыктатару давялося апраўдвацца на сустрэчы з губернатарам Смаленскай вобласці Васілём Анохіным:

«Хто б там у Расіі, я ўжо таксама кажу, ні вякаў: «Вось, Лукашэнка, шматвектарнасць… Зноў ён адпусціў гэтых палітвязняў некалькі дзясяткаў. Гэта значыць, ён ужо на Захад…» Слухайце, ну такое прымітыўнае мысленне, што далей няма куды. І гэта мы бачым і чуем.

Так, у нас ёсць краіна. Наш галоўны знешнепалітычны пасыл і наша імкненне — з суседзямі трэба жыць у міры, яны ад бога. Ну і што зробіш, калі палякі вякамі жылі з намі? (…) Тое ж самае літоўцы, латышы, украінцы».

«Рызыкну зрабіць выснову аб тым, што Лукашэнка фактычна анансаваў правядзенне рэферэндуму», —

заўважае Чалы і далей цытуе словы Лукашэнкі з сустрэчы са студэнтамі Лінгвістычнага ўніверсітэта:

«Выйдзем на рэферэндум — людзі вызначацца, напрыклад, што тычыцца пытанняў стратэгічнага партнёрства, узаемаадносін з бліжэйшымі суседзямі. Я хачу, каб мы былі ў добрых адносінах і з палякамі, і з расіянамі. Але жылі ў сваёй кватэры. Мы з усімі хочам сябраваць. Мы хочам, каб было добра. Таму што ў вайну дрэнна. Вось наш светапарадак — гэта мір і спакой».

• 1
• 4
• 3
• 2
• 0
• 0
• 0
• 0