Выдавец брытанскага таблоіда The Sun публічна выбачыўся перад прынцам Гары за незаконнае ўварванне ў яго асабістае жыццё і абавязаўся выплаціць яму кампенсацыю.
Пра дасягнутае дасудовае пагадненне паведаміў адвакат прынца Гары, малодшага сына брытанскага караля Карла III, у сераду ў Вярхоўным судзе Лондана, дзе павінен быў пачацца працэс па пададзеных прынцам ісках.
Гарры раней падаў пазовы супраць газет The Sun і цяпер неіснуючага выдання News of the World. Паведамляецца, што медыягрупа News Group Newspapers, якая належыць медыямагнату Руперту Мёрдаку, прызнала парушэнне закона: яна сачыла за прынцам Гары і яго блізкімі, атрымліваючы інфармацыю пра яго прыватнае жыццё. Сярод іншага быў узламаны яго тэлефон. Прынцу былі прынесены «поўныя і безумоўныя» выбачэнні.
Сума кампенсацыі не называецца, але адвакат прынца ахарактарызаваў яе як «істотную». Медыягрупа таксама папрасіла прабачэння за ўмяшанне ў прыватнае жыццё маці прынца Гары — лэдзі Дыяны. Пазоў ахопліваў перыяд з 1996 па 2011 гады.
СМІ адзначаюць, што прынцу Гары ўдалося дасягнуць важнай перамогі — выдавецтвы вельмі рэдка настолькі адназначна прызнаюць сваю віну ў падобных справах.
Раней медыягрупа Мёрдака заключыла дасудовыя пагадненні з больш чым 1300 людзьмі, якія абвінавачвалі яе ва ўзломах тэлефонаў. Гэты скандал у 2011 годзе прывёў да закрыцця газеты News of the World. Справа з прынцам Гарры заставалася апошняй і амаль дайшла да судовых слуханняў.
Прынц Гарры пасля шматлікіх спрэчак унутры каралеўскай сям’і некалькі гадоў таму спыніў выкананне афіцыйных абавязкаў. Большую частку часу ён жыве ў ЗША. Пры гэтым ён захаваў свой тытул і права спадчынніка трона, калі надыдзе яго чарга.
Дзяржаўныя сацыёлагі: Беларусы найперш звязваюць сваю дзяржаўнасць з Вялікім Княствам Літоўскім23
Каментары