Vydaviec brytanskaha tabłoida The Sun publična vybačyŭsia pierad pryncam Hary za niezakonnaje ŭvarvańnie ŭ jaho asabistaje žyćcio i abaviazaŭsia vypłacić jamu kampiensacyju.
Pra dasiahnutaje dasudovaje pahadnieńnie paviedamiŭ advakat prynca Hary, małodšaha syna brytanskaha karala Karła III, u sieradu ŭ Viarchoŭnym sudzie Łondana, dzie pavinien byŭ pačacca praces pa padadzienych pryncam iskach.
Harry raniej padaŭ pazovy suprać haziet The Sun i ciapier nieisnujučaha vydańnia News of the World. Paviedamlajecca, što miedyjahrupa News Group Newspapers, jakaja naležyć miedyjamahnatu Rupiertu Miordaku, pryznała parušeńnie zakona: jana sačyła za pryncam Hary i jaho blizkimi, atrymlivajučy infarmacyju pra jaho pryvatnaje žyćcio. Siarod inšaha byŭ uzłamany jaho telefon. Pryncu byli pryniesieny «poŭnyja i biezumoŭnyja» vybačeńni.
Suma kampiensacyi nie nazyvajecca, ale advakat prynca acharaktaryzavaŭ jaje jak «istotnuju». Miedyjahrupa taksama paprasiła prabačeńnia za ŭmiašańnie ŭ pryvatnaje žyćcio maci prynca Hary — łedzi Dyjany. Pazoŭ achoplivaŭ pieryjad z 1996 pa 2011 hady.
ŚMI adznačajuć, što pryncu Hary ŭdałosia dasiahnuć važnaj pieramohi — vydaviectvy vielmi redka nastolki adnaznačna pryznajuć svaju vinu ŭ padobnych spravach.
Raniej miedyjahrupa Miordaka zaklučyła dasudovyja pahadnieńni z bolš čym 1300 ludźmi, jakija abvinavačvali jaje va ŭzłomach telefonaŭ. Hety skandał u 2011 hodzie pryvioŭ da zakryćcia haziety News of the World. Sprava z pryncam Harry zastavałasia apošniaj i amal dajšła da sudovych słuchańniaŭ.
Prync Harry paśla šmatlikich sprečak unutry karaleŭskaj siamji niekalki hadoŭ tamu spyniŭ vykanańnie aficyjnych abaviazkaŭ. Bolšuju častku času jon žyvie ŭ ZŠA. Pry hetym jon zachavaŭ svoj tytuł i prava spadčyńnika trona, kali nadydzie jaho čarha.
Kamientary