Латушка: Рыжанкоў марыць стаць прэзідэнтам Беларусі і ненавідзіць Лукашэнку. Ён не пройдзе дэтэктар хлусні
У новым выпуску ТОКу былы пасол і міністр культуры Беларусі, а цяпер адзін з лідараў апазіцыі Павел Латушка даў сваю ацэнку міністра замежных спраў Беларусі Максіма Рыжанкова.
«Мая першая жонка з'яўляецца яго жонкай. І за гэта ён мне помсціў. Ну дзіўная рэч. Можа, ты шчасце атрымаў? Калі шчасце, то нашто помсціць?» — заўважыў Латушка наконт Максіма Рыжанкова.
Па словах палітыка, сённяшні міністр замежных спраў — вельмі амбіцыйны чалавек:
«Гэта той чалавек, які марыць пра тое, каб стаць прэзідэнтам Беларусі. Гэтая мара ў яго існавала, і думаю, што яна існуе да гэтага моманту. Гэта не азначае, што сёння гэта той чалавек, які можа арганізаваць змову з мэтай адхілення Лукашэнкі ад улады. Але тое, што ў яго гэтыя думкі ёсць, перакананы. Ён будзе рыхтавацца да гэтай сітуацыі.
Па-другое, Рыжанкоў ненавідзіць Лукашэнку. Яго нянавісць абгрунтаваная трагедыяй, якая, на жаль, напаткала яго сям'ю. Яна звязана з яго бацькам. Ён лічыць Лукашэнку вінаватым у смерці бацькі — тады той займаў пасаду міністра спорту»,
— расказаў Латушка і заўважыў: «Можа, калісьці прыйдзе час, і Рыжанкоў сам пра гэта раскажа, калі будзе мець смеласць».
Латушка выказаў упэўненасць, што Рыжанкоў не зможа сёння прайсці дэтэктар хлусні:
«Ён не пройдзе яго. Ён не прыхільнік Лукашэнкі. Я ў гэтым перакананы. Так што ў Лукашэнкі ёсць шанец — няхай праверыць, ці яго міністр замежных спраў так адданы яму».
Вядучая Наста Роўда нагадала адну з красамоўных і ганебных гісторый, звязаных з бацькам Максіма Рыжанкова. Падчас «Мінскай лыжні» пры публіцы ён, тады міністр спорту, мусіў прысесці і дапамагчы Лукашэнку зняць лыжы.
На пытанне, ці зараз Рыжанкоў-малодшы ў такім жа становішчы, Латушка адказаў:
«Я думаю, што ён паўтарае гэтую гісторыю свайго бацькі. Усе тыя, хто набліжаны да Лукашэнкі, мусяць праходзіць праз гэта кожны дзень альбо час ад часу, асабліва сёння. І Рыжанкоў таксама ў гэтай сітуацыі».
«Ён разумны чалавек. Ён адукаваны чалавек. Ён вельмі начытаны чалавек. Ён вельмі добра ведае гісторыю. Ён працаваў дыпламатам у Ізраілі. Ён разбіраецца ў сітуацыі вакол Ізраіля, у гэтым канфлікце. Ён падрыхтаваны да таго, каб быць міністрам замежных спраў.
Але праблема ў тым, што рысы яго характару — псіхалагічная няўстойлівасць, празмерная эмацыянальнасць, высокія амбіцыі, тое, што ён вельмі гаваркі — гэта ўсё, што мінусуе яму на пасадзе міністра замежных спраў Беларусі».
Цяпер чытаюць
Амерыканцы дабіліся вызвалення Юрыя Зянковіча. Ён быў прысуджаны да 11 гадоў зняволення12
Каментары