Расія на перамовах у Саудаўскай Аравіі патрабуе ўсю тэрыторыю чатырох украінскіх абласцей
Расійская дэлегацыя на перамовах з ЗША ў Саудаўскай Арабіі дамагаецца перадачы пад свой кантроль усёй тэрыторыі чатырох абласцей Украіны — Данецкай, Луганскай, Запарожскай і Херсонскай, расказалі The Moscow Times крыніцы, знаёмыя з логікай Крамля.
Хоць ніводзін з гэтых рэгіёнаў расійская армія не кантралюе цалкам, Крэмль разлічвае атрымаць іх у адміністрацыйных межах — у адпаведнасці з Канстытуцыяй Расіі, дзе замацаваная іх анексія.
Уладзімір Пуцін палітычна не можа сабе дазволіць страціць гэтыя тэрыторыі, і Расія мае намер любой цаной замацаваць над імі кантроль, сказаў The Moscow Times чыноўнік, блізкі да Крамля.
«У Канстытуцыі няма механізму для выхаду рэгіёнаў са складу Расіі. Нам патрэбныя ўся Запарожская і ўся Херсонская вобласці», — сказаў ён.
Са слоў іншай крыніцы, дзейнага расійскага чыноўніка, Крэмль спадзяецца, што Вашынгтон, магчыма, нават акажа ціск на Кіеў з патрабаваннем цалкам вывесці войскі з анексаваных Расіяй рэгіёнаў.
«Альбо Трамп паўплывае на іх, каб яны пайшлі, альбо нам скажуць: «Уступайце ў зацяжныя перамовы і паралельна выкарыстоўвайце вайсковую сілу для ўстанаўлення кантролю». Гэта горшы для нас варыянт, таму што фарсіраванне рэк — заўсёды балючая аперацыя», — растлумачыў чыноўнік.
У якасці альтэрнатывы Расія можа паспрабаваць захапіць частку іншай украінскай вобласці, напрыклад, Днепрапятроўскай або Сумскай, а затым прапанаваць абмен на Херсон і Запарожжа, працягнуў суразмоўца:
«Мы спадзяемся знайсці варыянт, пры якім не прыйдзецца фарсіраваць Дняпро і штурмаваць Херсон. Вельмі спадзяюся, што да гэтага не дойдзе. Гэта будзе азначаць для нас тысячы страт».
Паводле стану на люты расійская армія трымала пад кантролем 98,6% Луганскай вобласці, 62,6 — Данецкай, 71,9% — Запарожскай і 69,3% — Херсонскай. Прычым у двух апошніх рэгіёнах вайскоўцы не кантралююць іх цэнтры — Запарожжа і Херсон.
«Заняць гэтыя вобласці ваенным шляхам Расія хутка не здольная, кажа ізраільскі вайсковы эксперт Давід Шарп. Для расіян захоп нават пары сёлаў — ужо вялікае дасягненне, — канстатуе ён. — Каб фарсіраваць Дняпро і ўзяць Херсон, ці нават проста заняць горад Запарожжа, які размешчаны на абодвух берагах, павінна адбыцца нешта экстраардынарнае. Гэта вельмі цяжкая задача. Альбо расійская армія павінна быць кардынальна ўзмоцненая, што не адбудзецца раптоўна або зніадкуль, альбо абарона Украіны павінна цалкам абваліцца».
Але ў Маскве разлічваюць на тое, што адміністрацыі Дональда Трампа не гэтак важна, якія менавіта тэрыторыі адыдуць Крамлю, паведамілі The Moscow Times два расійскія дыпламаты.
«Наколькі я разумею, Трамп хоча бачыць сучасную, добра ўзброеную, празаходнюю Украіну, — сказаў адзін з іх. — Ён (Трамп) не можа проста так аддаць Украіну цалкам. Але дзе менавіта будзе праведзеная мяжа — для яго гэта не так ужо важна».
Уіткаф пра акупаваныя ўкраінскія тэрыторыі: Пераважная большасць людзей паказала, што хоча быць пад уладай Расіі
Генсак НАТА «цалкам верыць» у здольнасць Трампа дамовіцца пра мір ва Украіне
«Рускія і амерыканцы пляскаюць у ладкі». Масква, Берлін і Вашынгтон абмяркоўваюць аднаўленне паставак сыравіны ў Германію на НПЗ «Раснафты»
Спецпасланнік Трампа: Кіраўніцтва Украіны пагадзілася з правядзеннем прэзідэнцкіх выбараў
Тэлефонная размова Пуціна з Трампам стала самай працяглай за ўсю гісторыю двухбаковых адносін
Каментары