Буйнога беларускага рытэйлера могуць прызнаць фінансава неплацежаздольным
Оптава-лагістычны цэнтр «С-Відэа» звярнуўся ў суд з заявай аб сваёй неплацежаздольнасці. Гэтая кампанія ў апошнія гады прасоўвала крамы па гандлі бытавой тэхнікай і электронікай пад брэндам «Тэхна», але не змагла справіцца з крэдыторскай запазычанасцю. Суд разгледзіць яе справу 21 траўня, піша Office Life.
Як вынікае з інфармацыі на сайце кампаніі, зараз у сетцы «С-Відэа» 19 фірменных крам у 15 гарадах Беларусі, а таксама тры інтэрнэт-крамы — Techno.by, Atlantshop.by і Gefestshop.by. У кампаніі, створанай бізнэсмэнам Сяргеем Сяліцкім, налічваецца каля 240 супрацоўнікаў, і яна пакуль працягвае працаваць.
Некаторы час таму ў дачыненні да «С-Відэа» расследаванне праводзіў МАРГ. У 2024 годзе скаргу на кампанію падаў вытворца бытавой тэхнікі «Атлант». Прадпрыемства заявіла, што прыватная кампанія незаконна выкарыстоўвае ў сваёй рэкламе яго імя і таварны знак.
Гэтае пытанне як быццам вырашылася — у «С-Відэа» выканалі патрабаванні антыманапольнага органа. Але вырашыць праблему з фінансамі аказалася больш складана. Па дадзеных, агучаным у судзе, крэдыторская запазычанасць кампаніі складае больш за 21 млн рублёў.
Прычым яна расце, бо рэтэйлер працуе са стратамі, нягледзячы на праведзеныя перамовы з банкамі аб адтэрміноўках па крэдытах, закрыццё нерэнтабельных гандлёвых кропак і рэструктурызацыю запазычанасці.
Мяркуючы па дакументах суда, асноўнымі крэдыторамі «С-Відэа» з'яўляюцца банкі — Прыёрбанк і Беларусбанк. Акрамя таго, кампанія павінна шматлікім пастаўшчыкам, падрадчыкам і арэндадаўцам.
З іншага боку, актываў у рэтэйлера нават больш, чым даўгоў, — больш за 22 млн рублёў. Праўда, звыш 14 млн з іх — у таварах, каля 2,5 млн — асноўныя сродкі, крыху больш за 3,5 млн — «дэбіторка». Гэта значыць прызнаць фірму банкрутам з гэтымі лічбамі нельга. Так што хутчэй за ўсё яе чакае працэдура санацыі.
Цяпер чытаюць
На вайсковыя зборы масава забіраюць гродзенцаў. А што мінчукі? Падрыхтуйцеся, ваша чарга — 2027‑2028 гады1
Каментары