Bujnoha biełaruskaha rytejlera mohuć pryznać finansava niepłaciežazdolnym
Optava-łahistyčny centr «S-Videa» źviarnuŭsia ŭ sud z zajavaj ab svajoj niepłaciežazdolnaści. Hetaja kampanija ŭ apošnija hady prasoŭvała kramy pa handli bytavoj technikaj i elektronikaj pad brendam «Techna», ale nie zmahła spravicca z kredytorskaj zapazyčanaściu. Sud razhledzić jaje spravu 21 traŭnia, piša Office Life.
Jak vynikaje ź infarmacyi na sajcie kampanii, zaraz u sietcy «S-Videa» 19 firmiennych kram u 15 haradach Biełarusi, a taksama try internet-kramy — Techno.by, Atlantshop.by i Gefestshop.by. U kampanii, stvoranaj biznesmenam Siarhiejem Sialickim, naličvajecca kala 240 supracoŭnikaŭ, i jana pakul praciahvaje pracavać.
Niekatory čas tamu ŭ dačynieńni da «S-Videa» rasśledavańnie pravodziŭ MARH. U 2024 hodzie skarhu na kampaniju padaŭ vytvorca bytavoj techniki «Atłant». Pradpryjemstva zajaviła, što pryvatnaja kampanija niezakonna vykarystoŭvaje ŭ svajoj rekłamie jaho imia i tavarny znak.
Hetaje pytańnie jak byccam vyrašyłasia — u «S-Videa» vykanali patrabavańni antymanapolnaha orhana. Ale vyrašyć prablemu ź finansami akazałasia bolš składana. Pa dadzienych, ahučanym u sudzie, kredytorskaja zapazyčanaść kampanii składaje bolš za 21 młn rubloŭ.
Pryčym jana raście, bo retejler pracuje sa stratami, niahledziačy na praviedzienyja pieramovy z bankami ab adterminoŭkach pa kredytach, zakryćcio nierentabielnych handlovych kropak i restrukturyzacyju zapazyčanaści.
Miarkujučy pa dakumientach suda, asnoŭnymi kredytorami «S-Videa» źjaŭlajucca banki — Pryjorbank i Biełarusbank. Akramia taho, kampanija pavinna šmatlikim pastaŭščykam, padradčykam i arendadaŭcam.
Ź inšaha boku, aktyvaŭ u retejlera navat bolš, čym daŭhoŭ, — bolš za 22 młn rubloŭ. Praŭda, zvyš 14 młn ź ich — u tavarach, kala 2,5 młn — asnoŭnyja srodki, krychu bolš za 3,5 młn — «debitorka». Heta značyć pryznać firmu bankrutam z hetymi ličbami nielha. Tak što chutčej za ŭsio jaje čakaje pracedura sanacyi.
Kamientary