«Абсалютна нечаканыя і невытлумачальныя падзеі адбываюцца цяпер каля Зямлі». Выбух сонечнай плазмы паказвае рэкордную хуткасць
Надзвычайная сітуацыя разгортваецца ў міжпланетнай прасторы: да Зямлі дайшло сонечнае воблака плазмы, што было выкінута Сонцам толькі ўчора. Яго хуткасць і тэмпература перавышаюць усе звычайныя нормы і могуць прывесці да магутнай геамагнітнай буры пятага ўзроўню ўжо сёння.
«Абсалютна нечаканыя і пакуль проста невытлумачальныя падзеі адбываюцца цяпер каля Зямлі», — піша блог навукоўцаў «Лабараторыя сонечнай астраноміі».
Сёння раніцай, 1 чэрвеня, а 08:30 па мінскім часе адбылася надзвычайная падзея: касмічныя спадарожнікі ACE і DSCOVR, якія назіраюць за станам міжпланетнай прасторы, зафіксавалі рэзкі скачок параметраў сонечнага ветру.
Хуткасць сонечнага ветру ўзрасла да звыш 1000 км/с (звычайна — 300—500 км/с), тэмпература дасягнула 2 мільёна градусаў (што значна вышэй за норму ў 100 тысяч і нават тэмпературу ў сонечнай кароне).
Такія значэнні альбо зусім не фіксаваліся раней, альбо вельмі блізкія да гістарычных максімумаў, піша «Лабараторыя сонечнай астраноміі».
Паводле папярэдніх ацэнак, гэта магло быць так званае CME (Coronal Mass Ejection) — выбух плазмы з кароны Сонца, які адбыўся толькі ўчора. Калі гэта сапраўды ён, то аблокі плазмы дасягнулі Зямлі менш чым за 30 гадзін, што амаль на суткі хутчэй за звычайнае.
Гэта адна з самых хуткіх зафіксаваных даставак сонечнай матэрыі да Зямлі.
Такія з’явы могуць прывесці да геамагнітнай буры найвышэйшага 5-га ўзроўню, што суправаджаецца збоем у радыёсувязі, праблемамі з GPS, пашкоджаннямі спадарожнікаў, палярным ззяннем нават у сярэдніх шыротах і іншымі эфектамі.
Пакуль навукоўцы не ведаюць, ці гэта ўся маса плазмы або толькі яе хуткасны фрагмент. Калі ж асноўнае воблака яшчэ на шляху — наступствы могуць быць яшчэ мацнейшыя.
Цяпер чытаюць
«Людзі, будзьце пільныя! У такой сітуацыі можа апынуцца кожны жыхар ЕС!» Грамадзянін Літвы, асуджаны ў Беларусі да 13 гадоў за «шпіянаж», перадаў ліст з калоніі22
«Людзі, будзьце пільныя! У такой сітуацыі можа апынуцца кожны жыхар ЕС!» Грамадзянін Літвы, асуджаны ў Беларусі да 13 гадоў за «шпіянаж», перадаў ліст з калоніі
«Незалежнасць не падае з неба і не даецца назаўсёды. Яе трэба абараняць». Ціханоўская выступіла з заявай да 35-годдзя прыняцця Дэкларацыі аб суверэнітэце4141
Каментары