«Absalutna niečakanyja i nievytłumačalnyja padziei adbyvajucca ciapier kala Ziamli». Vybuch soniečnaj płazmy pakazvaje rekordnuju chutkaść
Nadzvyčajnaja situacyja razhortvajecca ŭ mižpłanietnaj prastory: da Ziamli dajšło soniečnaje vobłaka płazmy, što było vykinuta Soncam tolki ŭčora. Jaho chutkaść i tempieratura pieravyšajuć usie zvyčajnyja normy i mohuć pryvieści da mahutnaj hieamahnitnaj bury piataha ŭzroŭniu ŭžo siońnia.
«Absalutna niečakanyja i pakul prosta nievytłumačalnyja padziei adbyvajucca ciapier kala Ziamli», — piša błoh navukoŭcaŭ «Łabaratoryja soniečnaj astranomii».
Siońnia ranicaj, 1 červienia, a 08:30 pa minskim časie adbyłasia nadzvyčajnaja padzieja: kaśmičnyja spadarožniki ACE i DSCOVR, jakija nazirajuć za stanam mižpłanietnaj prastory, zafiksavali rezki skačok paramietraŭ soniečnaha vietru.
Chutkaść soniečnaha vietru ŭzrasła da zvyš 1000 km/s (zvyčajna — 300—500 km/s), tempieratura dasiahnuła 2 miljona hradusaŭ (što značna vyšej za normu ŭ 100 tysiač i navat tempieraturu ŭ soniečnaj karonie).
Takija značeńni albo zusim nie fiksavalisia raniej, albo vielmi blizkija da histaryčnych maksimumaŭ, piša «Łabaratoryja soniečnaj astranomii».
Pavodle papiarednich acenak, heta mahło być tak zvanaje CME (Coronal Mass Ejection) — vybuch płazmy z karony Sonca, jaki adbyŭsia tolki ŭčora. Kali heta sapraŭdy jon, to abłoki płazmy dasiahnuli Ziamli mienš čym za 30 hadzin, što amal na sutki chutčej za zvyčajnaje.
Heta adna z samych chutkich zafiksavanych dastavak soniečnaj materyi da Ziamli.
Takija źjavy mohuć pryvieści da hieamahnitnaj bury najvyšejšaha 5-ha ŭzroŭniu, što supravadžajecca zbojem u radyjosuviazi, prablemami z GPS, paškodžańniami spadarožnikaŭ, palarnym źziańniem navat u siarednich šyrotach i inšymi efiektami.
Pakul navukoŭcy nie viedajuć, ci heta ŭsia masa płazmy abo tolki jaje chutkasny frahmient. Kali ž asnoŭnaje vobłaka jašče na šlachu — nastupstvy mohuć być jašče macniejšyja.
Kamientary