Затрымалі 56 супрацоўнікаў кол-цэнтраў, якія падманам прадавалі БАДы
Кансультанты выкарыстоўвалі метады псіхалагічнага ўздзеяння, з дапамогай якіх ўводзілі ў зман пакупнікоў і пераконвалі іх у неабходнасці прыёму «лекаў».
Следчым упраўленнем па Мінску сумесна з аператыўнікамі ГУБАЗіКа спынена дзейнасць кіраўнікоў і ўдзельнікаў кол-цэнтраў, якія рэалізоўвалі харчовую прадукцыю пад выглядам медыцынскіх прэпаратаў і БАДаў, паведамляе СК.
«У 2021 годзе замежны грамадзянін запусціў пяць ашуканскіх кол-цэнтраў і інтэрнэт-крам, мэтанакіравана ўводзячы ў зман пакупнікоў. Фігуранты стваралі маляўнічыя сайты, напоўненыя ілжывымі водгукамі і падробленымі медыцынскімі рэкамендацыямі. Для надання даверу выкарыстоўвалі дзяржаўныя сімвалы нашай краіны і красамоўныя фармулёўкі «сацыяльная зніжка», «квота Міністэрства аховы здароўя Беларусі», а таксама іншыя недакладныя даныя», — адзначыў начальнік аддзела па расследаванні злачынстваў супраць інфармацыйнай бяспекі і незаконнага абароту наркотыкаў следчага ўпраўлення па Мінску Максім Дзегцяроў.
У розных рэгіёнах краіны затрымана 56 чалавек, уключаючы арганізатараў схемы, бухгалтараў, бізнэс-трэнераў і менеджараў.
Шасці найбольш актыўным удзельнікам злачыннай схемы прад'яўлена абвінавачванне па ч. 4 арт.209 (махлярства, здзейсненае арганізаванай групай) Крымінальнага кодэкса Рэспублікі Беларусь. З санкцыі пракурора да іх прыменена мера стрымання ў выглядзе заключэння пад варту.
Астатнія прызнаныя падазраванымі.
Следчымі праведзены ператрусы ў офісах і памяшканнях, звязаных з дзейнасцю кол-цэнтраў, канфіскаваныя дакументы, якія пацвярджаюць незаконныя аперацыі, а таксама ўзоры прадукцыі, якая рэалізуецца, дапытаныя больш за сотню ўдзельнікаў крымінальнага працэсу, прызначаныя экспертныя даследаванні. Накладзены арышт на маёмасць фігурантаў і падкантрольных ім юрыдычных асоб на агульную суму больш за мільён рублёў.
Менеджары атрымлівалі частку зарплаты афіцыйна, астатняе ў канвертах. Існавалі строгія правілы: калі кансультант страчваў кліента або прадаваў недастаткова прадукцыі, ён караўся штрафам.
«Сярод кансультантаў былі як знаёмыя кіраўнікоў злачыннага стартапа, так і выпадковыя людзі. Грамадзяне знаходзілі вакансіі на агульнадаступным папулярным сайце і прыходзілі на сумоўе. Разам з тым, пасля азнаямлення з умовамі «працы» яны не адмаўляліся ад такога працаўладкавання і заставаліся зарабляць свае працэнты на здароўі суайчыннікаў», — адзначыў Максім Дзегцяроў.
Прапаноўвалася лячэнне амаль усіх хвароб ад артрыту да паражэння печані, а ў выпадку, калі эфекту не назіралася, у менеджараў ўжо было гатова іншая прапанова, вядома ж, трохі даражэй.
Каментары
[Зрэдагавана]