Міністр замежных спраў Арменіі заклікаў Сяргея Лаўрова не ўмешвацца ва ўнутраныя справы Арменіі
«Гэта прававы працэс і ўнутраная справа Арменіі. Лепш бы Лаўрову не ўмешвацца ва ўнутраныя справы Ерэвана», — параіў Арарат Мірзаян.
Кіраўнік МЗС Арменіі Арарат Мірзаян заклікаў міністра замежных спраў Расіі Сяргея Лаўрова не ўмешвацца ва ўнутраныя справы Арменіі. Пра гэта Мірзаян заявіў на сумеснай прэс‑канферэнцыі з старшынёй вышэйшага прадстаўніцтва ЕC па замежных справах і палітыцы бяспекі — віцэ-прэзідэнтам Еўрапейскай камісіі Каяй Калас 30 чэрвеня ў Ерэване, каментуючы словы Лаўрова пра сітуацыю ў Арменіі, піша News.am.
Сяргей Лаўроў, выступаючы на прэс-канферэнцыі па выніках Савета міністраў замежных спраў АДКБ у Кыргызстане, даў ацэнку падзеям у Арменіі, дзе разгарэўся канфлікт урада Пашыняна з прадстаўнікамі Армянскай апостальскай царквы.
«Падзеі ў гэтай краіне — яе ўнутраныя справы, але напады на царкву выклікаюць занепакоенасць: Царква заўсёды была адной з ключавых апораў армянскага грамадства, і нам бы вельмі не хацелася, каб гэтая царква падвяргалася неабгрунтаваным нападам без якіх-небудзь сур’ёзных падстаў», — заявіў Лаўроў.
«Да прэс‑канферэнцыі паспеў азнаёміцца з каментаром любімага калегі — Лаўрова. Інфармацыя Лаўрова няпоўная і непраўдзівая. Калі не памыляюся, ён выкарыстаў выраз «барацьба ўладаў супраць царквы». Інфармацыя Лаўрова не адпавядае рэчаіснасці, у Арменіі не вядзецца барацьба ўладаў супраць царквы. Тое, што ён мае на ўвазе, ўключае ўдзел некалькіх царкоўнікаў у палітычнай дзейнасці», — заявіў Мірзаян.
Як дадаў Мірзаян, па інфармацыі праваахоўнікаў, ідзе гаворка пра ўдзел у падрыхтоўцы або ініцыяванні незаконнага перавароту.
«Гэта прававы працэс і ўнутраная справа Арменіі. Лепш бы Лаўрову не ўмешвацца ва ўнутраныя справы РА», — параіў Мірзаян, адрасуючы аналагічны заклік расійскім дэпутатам і медыя. Па яго меркаванні, яны павінны з вялікай павагай ставіцца да суверэнітэту Арменіі і ніколі больш не ўмешвацца ў справы Арменіі.
**
У пачатку мінулага тыдня сілавікі затрымалі архіепіскапа, лідара руху «Свяшчэнная барацьба» Баграта Галстаняна, а таксама суд задаволіў хадайніцтвы аб арышце дэпутата Нацыянальнага сходу Нагорнага Карабаха Давіда Галстаняна, памочніка архіепіскапа Баграта Галстаняна Маўсеса Шарбацяна, блогера Армена Алексаняна і палкоўніка запасу Міграна Махсудзяна тэрмінам на два месяц.
Следчы камітэт Арменіі 25 чэрвеня распаўсюдзіў заяву, згодна з якой удзельнікі і арганізатары «Свяшчэннай барацьбы» планавалі здзяйсненне тэрарыстычных актаў у Арменіі і замах на звяржэнне ўлады.
У падрыхтоўцы, як сцвярджаецца, удзельнічалі розныя асобы, у тым ліку былыя паліцэйскія і вайскоўцы. СК таксама апублікаваў шэраг аўдыязапісаў, у апазіцыі гэта адмаўляюць.
Таксама прэм'ер Пашынян неаднаразова рабіў нападкі на кіраўніцтва Армянскай апостальскай царквы і яе кіраўніка каталікоса Гарэгіна ІІ.
Каментары