Мінчукі скардзяцца на атручванне пасля наведвання вядомага рэстарана. Працу ўстановы прыпынілі
Нядаўна мінскі рэстаран Marumi на праспекце Незалежнасці, 18, актыўна крытыкавалі ў інтэрнэце: быццам бы пасля наведвання ўстановы ў гасцей назіраліся прыкметы атручвання, пішуць Мінск-навіны.
З 18 па 23 ліпеня на тэматычных інтэрнэт-сэрвісах пачалі з’яўляцца негатыўныя водгукі ад наведвальнікаў. Усе скардзіліся на дыярэю, тэмпературу і млоснасць:
«Была ў пятніцу, усё спадабалася, але ў суботу пачалося моцнае атручэнне. Ляжу ў бальніцы, тут сказалі, што ў іх я ўжо шосты чалавек з Marumi з атручэннем за апошні час. Праверцеся, сябры»;
«Хочам пацвердзіць водгук ніжэй. Абедалі ў рэстаране 19.07, і на наступны дзень атрымалі «пакет шчасця». У дзяўчыны паднялася тэмпература да 39 і больш за суткі не апускалася ніжэй за 38,3, у мяне лягчэй, але таксама ў піку — 38. Вельмі млосна і праблемы са стулам, цяпер, праз 3 дні, тэмпература спала, але праблемы з страўнікам захоўваюцца…»;
«У суботу, 19 ліпеня, наведалі дадзеную ўстанову, у замове былі пасты з крэветкамі і курыцай, сашымі, абое зляглі з атручэннем, тэмпература пад 40 і ўсе спадарожныя сімптомы, чацвёрты дзень стан адпаведны, дзякуй, смачна!»;
«17 ліпеня наведалі з сяброўкамі ваш рэстаран. Усе трое атрымалі атручэнне з тэмпературай 39».
Таксама ў сетцы з’явілася інфармацыя пра закрыццё рэстарана па тэхнічных прычынах, аднак на сайце ўстановы пра гэта нічога не сказана.
Тым не менш у Мінскім гарадскім цэнтры гігіены і эпідэміялогіі чуткі пацвердзілі:
— У сувязі з паступленнем зваротаў грамадзян на якасць харчавання, спецыялістамі санітарна-эпідэміялагічнай службы праведзена ацэнка выканання патрабаванняў санітарна-эпідэміялагічнага заканадаўства на згаданым аб’екце грамадскага харчавання. Яго дзейнасць прыпынена з 21 ліпеня з-за выяўленых парушэнняў.
Цяпер чытаюць
Бізнэсовец родам з Бабруйска адмовіцца ад свайго гіганцкага аўстралійскага заробку дзеля шанцу атрымаць $35 мільёнаў3
Каментары