Ілля Шкурын не змог паляцець на матч у Шатландыю, бо не мае пашпарта
Беларускі футбаліст Ілля Шкурын, які гуляе за варшаўскую «Легію», не змог паляцець на матч у Шатландыю 21 жніўня, бо ў яго скончыўся беларускі пашпарт і ён не змог атрымаць брытанскую візу, піша Legia.Net.
Трэнер «Легіі» Эдвард Іарданэску аб'явіў склад каманды на матч 4-га кваліфікацыйнага раунда Лігі Еўропы супраць «Хіберніана» ў Эдынбургу, але Шкурын не трапіў у лік 23 выкліканых гульцоў праз адсутнасць дзейнага пашпарта.
Брытанскія ўлады ставяць беларусам шматразовыя візы на розны тэрмін, але для гэтага патрэбен дзейны пашпарт. У Іллі Шкурына ёсць польскі праязны дакумент для паездак па Еўрасаюзе, але для Шатландыі патрэбна яшчэ брытанская віза. Шкурын проста не паспеў бы атрымаць візу ў праязны дакумент, бо тэрмін чакання расцягнуўся б.
Выданне адзначае, што Шкурын свабодна валодае польскай мовай і ў прынцыпе можа падаць заяву на польскае грамадзянства і пашпарт.
У ліпені Шкурын таксама прапусціў матч у Казахстане з-за рызыкі затрымання. Ён адкрыта крытыкуе Лукашэнку і ў 2020 годзе заявіў, што не паедзе ў зборную, пакуль Лукашэнка ва ўладзе.
Каментары