У Магілёве злавілі маньяка-ліфцёра, які ў 1990‑я згвалтаваў і забіў восем дзяўчат
Адна з самых жудасных спраў у гісторыі краіны атрымала завяршэнне. Раскрыта восем забойстваў дзяўчат ва ўзросце ад 12 да 20 гадоў у Магілёўскай, Віцебскай і Мінскай абласцях.
Следчыя раскрылі адну з самых крывавых гісторый сучаснай Беларусі. У перыяд з 1996 па 1999 год у Магілёўскай, Віцебскай і Мінскай абласцях была здзейснены серыя забойстваў і сэксуальных злачынстваў у дачыненні да дзяўчат і маладых жанчын ва ўзросце ад 12 да 20 гадоў.
Ахвяры былі жорстка забітымі ў пад’ездах, ліфтах, на лесвічных пляцоўках і дахах шматпавярховікаў.
Усяго даказана восем забойстваў, два замахі на забойства, згвалтаванні. Злачынцу шукалі 30 гадоў.
Яго ўдалося знайсці дзякуючы амаль татальнай праверцы — праверылі звыш 100 тысяч мужчын, якія па ўзросце і прыкметах маглі мець дачыненне да спраў.
У выніку быў выяўлены і затрыманы 53‑гадовы жыхар Магілёва. Яго затрымалі ў цэнтры горада пры ўдзеле спецпадраздзялення «Алмаз».
Ён даў прызнальныя паказанні, якія пацвердзіліся экспертызамі і іншымі следчымі дзеяннямі.
«Пасля службы ў войску ён быў працаўладкаваны на адным з прадпрыемстваў Магілёва. Дадзеная праца давала яму магчымасць перасоўвацца ў зручны час на чыгуначным транспарце. У 1999 годзе гэты мужчына трапляў у поле зроку праваахоўных органаў і праз гэта спалохаўся. Гэты чалавек па натуры баязлівец. Ён расказаў, што скончыў забіваць, калі спалохаўся, што яго могуць заўважыць, пачуць. У далейшым ён жыў у сваім прыватным доме, працаваў на прадпрыемстве, дзе ў яго не было ніякіх канфліктаў. Ён вёў адасоблены лад жыцця, імкнучыся не трапляць ніякім чынам у поле зроку праваахоўных органаў. Сям'і ў яго ніколі не было»,
— распавёў пра падазраванага начальнік Галоўнага ўпраўлення крымінальнага вышуку крымінальнай міліцыі МУС Аляксандр Капішаў.
На допытах мужчына казаў, што не забіваў бы, «калі б яны не крычалі». Расказаў, што ахвяраў не выбіраў, забіваў тых, хто трапляўся.
У заключэнні стацыянарнай комплекснай судовай экспертызы, гаворыцца, што мужчына гвалтаваў трупы: «Дык якая розніца? Яна яшчэ цёпленькая, толькі не супраціўляецца. Што дабру прападаць ужо?» — казаў ён.
На следчым эксперыменце яго спыталі, навошта біў труп адвёрткай. «У мяне была адвёртка. Я думаў, праб'е яна скуру ці не праб'е. Яна не прабіла», — адказаў ён.
Следства просіць звяртацца да іх тых, хто мае дадатковую інфармацыю пра злачынную дзейнасць падазраванага.
Цяпер чытаюць
«Мы даём Штатам тое, што яны хочуць». Расійскі канал апублікаваў відэа, якое называюць запісам Рыжанкова схаванай камерай у машыне13
Каментары