U Mahilovie złavili mańjaka-lifciora, jaki ŭ 1990‑ia zhvałtavaŭ i zabiŭ vosiem dziaŭčat
Adna z samych žudasnych spraŭ u historyi krainy atrymała zaviaršeńnie. Raskryta vosiem zabojstvaŭ dziaŭčat va ŭzroście ad 12 da 20 hadoŭ u Mahiloŭskaj, Viciebskaj i Minskaj abłaściach.
Śledčyja raskryli adnu z samych kryvavych historyj sučasnaj Biełarusi. U pieryjad z 1996 pa 1999 hod u Mahiloŭskaj, Viciebskaj i Minskaj abłaściach była ździejśnieny sieryja zabojstvaŭ i seksualnych złačynstvaŭ u dačynieńni da dziaŭčat i maładych žančyn va ŭzroście ad 12 da 20 hadoŭ.
Achviary byli žorstka zabitymi ŭ padjezdach, liftach, na leśvičnych placoŭkach i dachach šmatpaviarchovikaŭ.
Usiaho dakazana vosiem zabojstvaŭ, dva zamachi na zabojstva, zhvałtavańni. Złačyncu šukali 30 hadoŭ.
Jaho ŭdałosia znajści dziakujučy amal tatalnaj praviercy — pravieryli zvyš 100 tysiač mužčyn, jakija pa ŭzroście i prykmietach mahli mieć dačynieńnie da spraŭ.
U vyniku byŭ vyjaŭleny i zatrymany 53‑hadovy žychar Mahilova. Jaho zatrymali ŭ centry horada pry ŭdziele śpiecpadraździaleńnia «Ałmaz».
Jon daŭ pryznalnyja pakazańni, jakija paćvierdzilisia ekśpiertyzami i inšymi śledčymi dziejańniami.
«Paśla słužby ŭ vojsku jon byŭ pracaŭładkavany na adnym z pradpryjemstvaŭ Mahilova. Dadzienaja praca davała jamu mahčymaść pierasoŭvacca ŭ zručny čas na čyhunačnym transparcie. U 1999 hodzie hety mužčyna traplaŭ u pole zroku pravaachoŭnych orhanaŭ i praz heta spałochaŭsia. Hety čałaviek pa natury bajaźliviec. Jon raskazaŭ, što skončyŭ zabivać, kali spałochaŭsia, što jaho mohuć zaŭvažyć, pačuć. U dalejšym jon žyŭ u svaim pryvatnym domie, pracavaŭ na pradpryjemstvie, dzie ŭ jaho nie było nijakich kanfliktaŭ. Jon vioŭ adasobleny ład žyćcia, imknučysia nie traplać nijakim čynam u pole zroku pravaachoŭnych orhanaŭ. Siamji ŭ jaho nikoli nie było»,
— raspavioŭ pra padazravanaha načalnik Hałoŭnaha ŭpraŭleńnia kryminalnaha vyšuku kryminalnaj milicyi MUS Alaksandr Kapišaŭ.
Na dopytach mužčyna kazaŭ, što nie zabivaŭ by, «kali b jany nie kryčali». Raskazaŭ, što achviaraŭ nie vybiraŭ, zabivaŭ tych, chto traplaŭsia.
U zaklučeńni stacyjanarnaj kompleksnaj sudovaj ekśpiertyzy, havorycca, što mužčyna hvałtavaŭ trupy: «Dyk jakaja roźnica? Jana jašče ciopleńkaja, tolki nie supraciŭlajecca. Što dabru prapadać užo?» — kazaŭ jon.
Na śledčym ekśpierymiencie jaho spytali, navošta biŭ trup adviortkaj. «U mianie była adviortka. Ja dumaŭ, prabje jana skuru ci nie prabje. Jana nie prabiła», — adkazaŭ jon.
Śledstva prosić źviartacca da ich tych, chto maje dadatkovuju infarmacyju pra złačynnuju dziejnaść padazravanaha.
Ciapier čytajuć
«My dajom Štatam toje, što jany chočuć». Rasijski kanał apublikavaŭ videa, jakoje nazyvajuć zapisam Ryžankova schavanaj kamieraj u mašynie14
Kamientary