Як змяніліся настроі ў беларускім грамадстве за апошнія гады і што людзі насамрэч думаюць пра рэжым Лукашэнкі? Пра гэта ў новым выпуску сумеснай праграмы «Банку ідэй» і Еўрарадыё разважае сацыёлаг Генадзь Коршунаў.
Паводле сацыёлага, апошняе даследаванне, вынікі якога прэзентуюць у лістападзе, паказала галоўную змену: у параўнанні з красавіком 2022 года страх перад вайной у грамадстве знізіўся амаль у два разы. На першыя месцы выйшлі традыцыйныя праблемы — эканоміка і бяспека.
«З аднаго боку, людзі кажуць: «Вельмі добра, што на вуліцы няма крыміналу, вельмі добра, што мы не ўвайшлі ў вайну, але на гэтым як бы пражыць даволі цяжка. Таму давайце паглядзім, што ў нас там з цэнамі — утрымлівай іх, не ўтрымлівай… — што ў нас з заробкамі». І гэтак далей», — тлумачыць Коршунаў.
Яшчэ адзін красамоўны вынік апытання — адчуванне пагрозы ад уласнай дзяржавы.
«У 2024‑м годзе было файнае даследаванне, і адна з лічбаў [гэта] тое, што амаль палова кажа: «Ну, насамрэч вельмі неспакойна. Але не на вуліцы, а неспакойна ад нашай дзяржавы».
Коршунаў тлумачыць:
«То-бок наша дзяржава сваім грамадствам успрымаецца як пагроза. Гэта нонсэнс. (…) Я б казаў, што рэжым успрымаецца прынамсі часткай грамадства як акупацыйны, наколькі гэта пасуе ці не пасуе для традыцыйнага навуковага разумення гэтага феномену».
Коршунаў дадаў, што пытанне бяспекі рэспандэнты ўсіх узроставых груп называлі як адну з галоўных задач дзяржавы. Пры гэтым найбольш увагі яму надала менавіта моладзь.
Генадзь Коршунаў — гэта былы дырэктар Інстытута сацыялогіі Акадэміі навук, якога звольнілі ў 2020 годзе за тое, што ён агучыў рэальныя лічбы падтрымкі Аляксандра Лукашэнкі.
Цяпер чытаюць
Што вядома пра Максіма Палянскага і Мікалая Свірыдава — беларускіх альпіністаў, якія зніклі ў гарах Кыргызстана3
Каментары
A калі было па іншаму ў краіне якая працуе на маскоўскай мове на азіяцкіх ( дзяржаўных ) наратывах ? пачынайце ў хаце на роднай мове размаўляць і дзяржава зменіцца