Магчыма, выйдуць на свабоду палітвязні. Аднак глабальна Беларусь застанецца дыктатурай і пад расіянамі
Лукашэнка заявіў, што гатовы да здзелкі з ЗША. Калі «вялікая здзелка» здарыцца, яна можа задаць беларусам новыя правілы гульні, але хіба толькі на пару месяцаў ці пару гадоў, мяркуе Мікола Бугай.
Яшчэ першыя «Тамагаўкі» не паляцелі, а Лукашэнка ўжо заявіў, што гатовы да вялікай здзелкі з ЗША.
«Рашаем? Давайце будзем вырашаць. Мы да гэтага гатовыя. Прапановы Дональда Трампа ў гэтым плане я абсалютна ацэньваю нармальна».
Лукашэнка рассыпаўся ў кампліментах Трампу.
«Трэба аддаць належнае: пры ўсіх недахопах Дональд робіць рашучыя крокі ў свеце па рашэнні глабальных пытанняў».
Аднак паказальна, што на нараду запрасілі спецыялістаў па генацыдзе беларускага народа, а не міністра замежных спраў.
Важны для разумення момант. Лукашэнка размаўляе з амерыканцамі і робіць выгляд дружбы з Трампам, бо лічыць гэта ва ўсіх сэнсах і, перадусім, іміджава выгадным для сябе і ва ўсіх сэнсах нявыгадным для Еўропы.
Аднак Лукашэнка можа вырашаць з Трампам усё, што хоча, але рашэнне, здымаць санкцыі ці не здымаць, будуць прымаць еўрапейцы, прычым галоўны голас будзе за Варшавай і Вільняй. Так яно працуе ў ЕС і заходнім блоку, насуперак таму, што сцвярджае прапаганда.
Словам Лукашэнкі не вераць і не павераць. Будуць рэальныя крокі Мінска — будуць знятыя санкцыі. Не будуць — не будуць, лятай праз Маскву, раз ты такі. Даверу няма і не будзе, пакуль робіцца тое, што робіцца. І спадзяванняў вялікіх няма.
Рэчаіснасць такая, што Беларусь стала (лукашысты свядома зрабілі яе) часткай расійскага плана захопу Украіны і Еўропы. План сарваўся, а Беларусь застаецца ў ім. З гэтым даводзіцца жыць — і ім, і нам, з гэтым патроху будуць разбірацца. Расія страціла Сірыю, страціла Арменію, страціла ўплыў на Блізкім Усходзе, але за Беларусь трымаецца зубамі і ўсё яшчэ верыць, што здолее дадушыць Украіну. Ёсць меркаванне, што «Тамагаўкі» яе працверазяць. Ёсць іншае меркаванне — што адных «Тамагаўкаў» будзе замала.
Сапраўдны пераломны момант для Беларусі надыдзе толькі тады, калі Расія спыніцца і адрачэцца свайго імперыялістычнага плана, калі пагодзіцца спыніць агонь ва Украіне — каму даручаць ролю пасярэдніка, пытанне другаснае (Лукашэнка хацеў бы, каб яму; амерыканцам жа найбольш трэба, каб усходні фланг НАТА быў бяспечны, а іх армія магла сканцэнтравацца на Кітаі).
Так што калі «вялікая здзелка» Лукашэнкі з Трампам зараз і здарыцца, яна задасць правілы гульні толькі на некалькі гадоў ці некалькі месяцаў.
Магчыма, выйдуць на свабоду палітвязні. Магчыма, Мінск перакрые кранік з мігрантамі. Аднак на сапраўдныя перамены пакуль спадзяванняў няма.
Сёння выпусціў — заўтра насадзіў. Сёння падкруціў — заўтра адкапурыў. Свая рука ўладыка, а спецыялісты па генацыдзе нікуды не падзеліся — вось яны, натуюць каштоўныя ўказанні.
Лукашэнка сказаў: «Важна, каб нашыя дзеянні не нанеслі шкоды не толькі беларуска-расійскім, але і беларуска-кітайскім адносінам». У перакладзе на нармальную мову гэта азначае, што Беларусь пакуль па-ранейшаму застанецца дыктатурай і пад расіянамі.
Каментары
... атрымала Грузію, знайшла хаўруснікаў у Венгрыі (Вугоршчыне) і Славакіі, карумпавала заходнія (еўрапейскія і амерыканскія) эліты, знайшла з іх часткай агульныя "новыя ватныя" псеўдатрадыцыйныя антыдэмакратычныя каштоўнасці.
Апошняе значна больш небяспечнае для Беларусі і свету за астатнія палітычныя фактары.
Лукашэнкаўская Беларусь не зменіцца і калі (пры умовах калі) Расея зробіць паўзу ва Украіне. Стратэгія выбрана: мілітарызацыя, вертыкаль, карнікі і ніякай грамадзянскай супольнасці.