Лукашэнка ўзяўся за школьныя абеды і прыдумаў, што рабіць з адкідамі ў сталоўках
На сённяшняй нарадзе Аляксандр Лукашэнка несупынна трос пустымі кішэнямі: «грошай у краіне няма», «ці дастаткова зацягнулі паясы?», «кіньце хадзіць сюды па грошы!», «пачняце паміраць — тады прыходзьце». Адным з пытанняў стала харчаванне для дзяцей, на якое выдаткоўваюць вялікія грошы. Таму Лукашэнка патрабуе знайсці, як тут зэканоміць.
Паводле слоў Лукашэнкі, харчаванне ва ўстановах адукацыі знаходзіцца на пастаянным яго кантролі. Ён згадаў, што некалі ўжо даручыў «выпрацаваць нармальную сістэму».
«Ці мы дзесьці будзем гатаваць, ну, напрыклад, Мінск узяць, абеды і таму падобнае, як гэта зрабілі ў Маскве і ў Расіі (толькі па-нармальнаму будзем забяспечваць, не набліжаным аддадзім гэты бізнэс, а дзяржава возьме на сябе гэтыя абавязкі). Дапусцім, у Мінску прыгатавалі на нейкай кухні, адвезлі па школах — раздалі. Усё дакладна і зразумела», — прапанаваў ён.
Бо цяпер, кажа Лукашэнка, невядома, хто колькі крадзе.
«Што ў нас зараз адбываецца? У кожнай школе ў нас сталовая — лічыце, забягалаўка. Што там гатуюць? Як гатуюць? Хто гатуе? Цяжка ўявіць. Хаця вы мне пішаце: у вас усё пад кантролем. Слухайце, вы што, мяне незямным чалавекам лічыце? Ды немагчыма гэта пракантраляваць, асабліва крадзеж», — наракае Лукашэнка.
Да таго, што шмат крадуць, шмат застаецца і адходаў, кажа ён.
«Усё ідзе ў адходы. Можна ўтрымліваць свінагадоўчы комплекс пры кожнай школе для таго, каб адходамі карміць свіней. Ці, можа, нейкую іншую жывёлу», — знайшоў выхад Лукашэнка.
Цяпер чытаюць
Чым цяпер жыве Ксенія Волкава з «Апошняга героя»? Чвэрць стагоддзя таму гэтая беларуска трапіла на трапічны востраў1
Каментары
А пра крадзяжы, то ўвогуле па Фрэйдзе. Злодзей крычыць - хапайце злодзеяў 😎