Актывіст і палітычны вязень Мікола Дзядок параіў, што мае сэнс рабіць беларусам у эміграцыі, каб наблізіць перамены. Адказ можа падацца нечаканым.
У інтэрв'ю «Радыё Свабода» разважаючы пра тое, што рабіць беларусам у выгнанні, каб нейкім чынам наблізіць перамены, Мікола Дзядок даў адназначную параду: працаваць над сабой.
«Я лічу, што праца асабістая кожнага чалавека над сабой — гэта не менш важная рэвалюцыйная праца, чым стварэнне нейкіх сацыяльных інстытутаў, рэвалюцыйных ячэек і ўсяго астатняга», — падкрэсліў актывіст.
Паводле яго, паспяховае дэмакратычнае грамадства не можа быць пабудавана людзьмі, якія ў штодзённым жыцці праяўляюць абыякавасць да іншых, не выконваюць сваіх абяцанняў, хлусяць, цярпяць хамства на працоўным месцы:
«Давайце для пачатку задумаемся, якое грамадства могуць пабудаваць людзі, якія ў штодзённасці, у побыце, у сваіх штодзённых справах хлусяць адзін аднаму, не выконваюць свае абяцанні, не могуць падтрымаць бліжняга, не ведаюць нават, хто з імі жыве на лесвічнай клетцы, ці ёсць у гэтага чалавека нейкія патрэбы?
Якое грамадства могуць пабудаваць людзі, якія на сваім працоўным месцы церпяць хамства і прыніжэнне, да прыкладу, ад свайго начальніка, і мірацца з гэтым, якія праходзяць (…) [калі] на вуліцы (…) проста валяецца чалавек. Яны праходзяць міма яго, думаючы: «Ай, п'янтос напэўна, хай валяецца сабе, мянты забяруць».
Давер як база дэмакратыі
Блогер звяртае ўвагу на тое, што ключавым элементам дэмакратычнага грамадства з'яўляецца давер і любоў да бліжняга. Па яго словах, рэпрэсіўная сістэма мэтанакіравана б’е па гэтых элементах.
«Трэніраваць любоў да бліжняга, трэніраваць здольнасць прабачаць бліжняму і, галоўным чынам, давер. Давер да блізкіх людзей, практыкаваць яго штодзённа, бо давер — гэта база любога дэмакратычнага грамадства», — заклікае Мікола Дзядок.
Ён звяртае ўвагу на тое, што асноўная мэта тактыкі рэжыму — ліквідаваць давер сярод актывістаў, лідараў апазіцыі і нават грамадзянскай супольнасці ў цэлым. Гэтая тактыка накіравана на тое, каб дэмаралізаваць грамадства.
«Як мы бачым, усе іхнія рэпрэсіўныя тактыкі, яны скіраваныя пераважна на тое, каб ліквідаваць давер між сябрамі як рэвалюцыйных арганізацый, так і грамадзянскай супольнасці.
Паглядзіце, якія высілкі прыкладаюцца там, каб закідаць брудам нашых апазіцыйных лідараў, усіх мала-мальскіх актыўных людзей, дыскрэдытаваць, і праз дыскрэдытацыю дэмаралізаваць. Каб мы не верылі адзін у аднаго, адзін у адным падазравалі агентаў КДБ. Падазравалі, што «а вось гэты скраў 150 мільёнаў грантаў, а гэты там яшчэ нехта, а гэты яшчэ хтосьці».
«Вось гэтая праца над сабой, тое ўсё, што запісана ў Бібліі — любіць бліжняга, як самога сябе, падтрымліваць бліжняга, думаць аб бліжнім больш, чым аб сабе.
Канешне, гэта супер складана, гэта вельмі высокі ўзровень, але гэты ўзровень неабходны для таго, каб дасягнуць лепшага грамадства і для таго, каб на новым вітку абуджэння беларусаў нам дасягнуць неабходных высноваў», — даводзіць Дзядок.
Акрамя маральнага развіцця, Дзядок падкрэслівае неабходнасць самаадукацыі ў палітычнай сферы і ў галіне сацыяльных навук, каб не стаць ахвярай маніпулятараў:
«Адукоўвацца палітычна, у сферы сацыяльных навук, каб не стаць ахвярай маніпулятараў, якіх было вельмі шмат у 2020 годзе».
«Далі 3600 рублёў штрафу». На беларуску напісаў палітычны данос хлопец, з якім яна хадзіла на спатканні і якога злавіла на здрадзе31
Каментары
Ды і ў адрозненне ад шматлікіх анціфашыстаў з Беларусі, ведае беларускую мову. Адметна. Мікола факусуецца на рэальных беларускіх праблемах, а не інтэрнацыяналістычнай ультралевай павестцы пра гендары, лгбткйцуке+ і іншым такім.