Захарава па-хамску пракаментавала абрынанне вежы ў Рыме. Італьянцы ў адказ паабяцалі ўзмацніць падтрымку Украіны
Прэс-сакратарка МЗС РФ Марыя Захарава, афіцыйна каментуючы інфармацыю пра абвальванне часткі сярэднявечнай вежы Торэ-дэі-Конці ў Рыме, звязала гэта з ваеннай падтрымкай Рымам Украіны, заявіўшы, што «пакуль італьянскі ўрад будзе працягваць марнаваць грошы падаткаплацельшчыкаў, Італія, ад сваёй эканомікі да сваіх вежаў, цалкам разваліцца». Італьянцы абурыліся.
Міністр замежных спраў Італіі Антоніа Таяні 4 лістапада заявіў расійскаму дыпламатычнаму прадстаўніку, што абразы з боку Расіі на адрас Італіі толькі ўзмоцняць падтрымку Рымам Украіны, паведамляе агенцтва ANSA.
Паведамляецца, што пасол Расіі ў Італіі Аляксей Парамонаў быў выкліканы Міністэрствам замежных спраў Італіі ў Рыме ў панядзелак для афіцыйнага выказвання пратэсту супраць каментароў Марыі Захаравай. Сам расійскі пасол у МЗС не з'явіўся, адправіўшы замест сябе намесніка кіраўніка місіі.
Дыпламату быў выказаны афіцыйны пратэст, а «вульгарныя словы прэс-сакратаркі МЗС Расіі Захаравай былі аспрэчаныя».
Міністэрства замежных спраў Італіі заявіла, што
«не зменіць сваёй знешнепалітычнай пазіцыі або сваіх настрояў з-за безразважных слоўных нападак. Усе агрэсіўныя заявы Расіі толькі падмацоўваюць перакананне італьянскага народа ў тым, што яны абараняюць тых, хто падвяргаецца нападу, у незаконным і неапраўданым акце агрэсіі, які парушае міжнароднае права».
Падчас учарашняга абвалу вежы Торэ-дэі-Конці, якая праходзіла рэстаўрацыю, загінуў адзін чалавек. Румынскага 66‑гадовага рабочага Актая Страічы 11 гадзін ратавалі з-пад завалаў. Доўгі час ён быў у свядомасці і камунікаваў з ратавальнікамі, але памёр па дарозе ў бальніцу, нягледзячы на намаганні медыкаў. Акрамя яго, пацярпелі яшчэ трое рабочых.
Цяпер чытаюць
«Толькі тры чалавекі будуць ведаць пра вас. Самы першы чалавек краіны». З'явіліся запісы размоў шпіёнкі Іны Кардаш з куратарам15
«Толькі тры чалавекі будуць ведаць пра вас. Самы першы чалавек краіны». З'явіліся запісы размоў шпіёнкі Іны Кардаш з куратарам
«Лукашэнка павінен панесці адказнасць за саўдзел у расійскай агрэсіі». Міністр замежных спраў Украіны расказаў пра новую палітыку ў дачыненні да Беларусі2525
Каментары