Zacharava pa-chamsku prakamientavała abrynańnie viežy ŭ Rymie. Italjancy ŭ adkaz paabiacali ŭzmacnić padtrymku Ukrainy
Pres-sakratarka MZS RF Maryja Zacharava, aficyjna kamientujučy infarmacyju pra abvalvańnie častki siaredniaviečnaj viežy Tore-dei-Konci ŭ Rymie, źviazała heta z vajennaj padtrymkaj Rymam Ukrainy, zajaviŭšy, što «pakul italjanski ŭrad budzie praciahvać marnavać hrošy padatkapłacielščykaŭ, Italija, ad svajoj ekanomiki da svaich viežaŭ, całkam razvalicca». Italjancy aburylisia.
Ministr zamiežnych spraŭ Italii Antonia Tajani 4 listapada zajaviŭ rasijskamu dypłamatyčnamu pradstaŭniku, što abrazy z boku Rasii na adras Italii tolki ŭzmocniać padtrymku Rymam Ukrainy, paviedamlaje ahienctva ANSA.
Paviedamlajecca, što pasoł Rasii ŭ Italii Alaksiej Paramonaŭ byŭ vyklikany Ministerstvam zamiežnych spraŭ Italii ŭ Rymie ŭ paniadziełak dla aficyjnaha vykazvańnia pratestu suprać kamientaroŭ Maryi Zacharavaj. Sam rasijski pasoł u MZS nie źjaviŭsia, adpraviŭšy zamiest siabie namieśnika kiraŭnika misii.
Dypłamatu byŭ vykazany aficyjny pratest, a «vulharnyja słovy pres-sakratarki MZS Rasii Zacharavaj byli asprečanyja».
Ministerstva zamiežnych spraŭ Italii zajaviła, što
«nie źmienić svajoj źniešniepalityčnaj pazicyi abo svaich nastrojaŭ z-za biezrazvažnych słoŭnych napadak. Usie ahresiŭnyja zajavy Rasii tolki padmacoŭvajuć pierakanańnie italjanskaha naroda ŭ tym, što jany abaraniajuć tych, chto padviarhajecca napadu, u niezakonnym i nieapraŭdanym akcie ahresii, jaki parušaje mižnarodnaje prava».
Padčas učarašniaha abvału viežy Tore-dei-Konci, jakaja prachodziła restaŭracyju, zahinuŭ adzin čałaviek. Rumynskaha 66‑hadovaha rabočaha Aktaja Straičy 11 hadzin ratavali z-pad zavałaŭ. Doŭhi čas jon byŭ u śviadomaści i kamunikavaŭ z ratavalnikami, ale pamior pa darozie ŭ balnicu, niahledziačy na namahańni miedykaŭ. Akramia jaho, paciarpieli jašče troje rabočych.
Ciapier čytajuć
«Maje śpinahryzy sa mnoj». Cichanoŭskaja raskazała, što ŭžo vybiraje dla dziaciej škołu ŭ Varšavie9
Kamientary