Навукоўцы прыйшлі да высновы, што не толькі сабакі, але і коні здольныя адчуваць страх чалавека па паху. Як паказала даследаванне, апублікаванае ў часопісе Plos One, у коней паскараўся пульс і яны станавіліся менш кантактнымі, калі адчувалі пах поту спалоханых людзей, піша The Guardian.
Французскія даследчыкі правялі эксперымент з удзелам добраахвотнікаў. Ім пад пахі клалі ватныя дыскі, пасля чаго паказвалі або фрагменты фільма жахаў, або вясёлыя сцэны з кінастужак. Потым гэтыя дыскі размяшчалі каля ноздраў коней.
Далей вучоныя назіралі за паводзінамі жывёл: як часта яны падыходзілі да даглядчыка, ці дакраналіся да яго, а таксама як рэагавалі на нечаканыя раздражняльнікі, напрыклад, раптоўна раскрыты парасон падчас кармлення.
Высветлілася, што пры паху страху ў людзей коні мелі больш высокае сэрцабіццё, выглядалі больш напалоханымі і трымаліся ад людзей на адлегласці. Пры гэтым узровень гармону стрэсу — картызолу — істотна не змяняўся.
Аўтарка даследавання адзначыла, што вершнікам і тым, хто працуе з коньмі, варта сачыць за сваім эмацыйным станам. Спакой і пазітыўны настрой дапамагаюць лепш узаемадзейнічаць з жывёламі, тады як страх чалавека можа выклікаць у каня сустрэчную трывогу і мацнейшую рэакцыю на небяспеку.
Калі гэтыя высновы пацвердзяцца ў далейшых даследаваннях, гэта будзе азначаць, што страх можа «перадавацца», а лятучыя рэчывы ў чалавечым поце служаць для жывёл сігналам магчымай пагрозы. Навукоўцы падкрэсліваюць, што гэта яшчэ адно сведчанне таго, што эмацыйныя сігналы могуць пераадольваць межы паміж рознымі відамі.
Цяпер чытаюць
З праекта будаўніцтва мінскага метро выкінулі яшчэ дзве станцыі — «Кіеўскі сквер» і «Політэхнічную»7
Каментары