Koni, jak i sabaki, zdolnyja adčuvać pach ludskoha strachu
Navukoŭcy pryjšli da vysnovy, što nie tolki sabaki, ale i koni zdolnyja adčuvać strach čałavieka pa pachu. Jak pakazała daśledavańnie, apublikavanaje ŭ časopisie Plos One, u koniej paskaraŭsia puls i jany stanavilisia mienš kantaktnymi, kali adčuvali pach potu spałochanych ludziej, piša The Guardian.
Francuzskija daśledčyki praviali ekśpierymient z udziełam dobraachvotnikaŭ. Im pad pachi kłali vatnyja dyski, paśla čaho pakazvali abo frahmienty filma žachaŭ, abo viasiołyja sceny z kinastužak. Potym hetyja dyski raźmiaščali kala nozdraŭ koniej.
Dalej vučonyja nazirali za pavodzinami žyvioł: jak časta jany padychodzili da dahladčyka, ci dakranalisia da jaho, a taksama jak reahavali na niečakanyja razdražnialniki, naprykład, raptoŭna raskryty parason padčas karmleńnia.
Vyśvietliłasia, što pry pachu strachu ŭ ludziej koni mieli bolš vysokaje sercabićcio, vyhladali bolš napałochanymi i trymalisia ad ludziej na adlehłaści. Pry hetym uzrovień harmonu stresu — kartyzołu — istotna nie źmianiaŭsia.
Aŭtarka daśledavańnia adznačyła, što vieršnikam i tym, chto pracuje z końmi, varta sačyć za svaim emacyjnym stanam. Spakoj i pazityŭny nastroj dapamahajuć lepš uzajemadziejničać z žyviołami, tady jak strach čałavieka moža vyklikać u kania sustrečnuju tryvohu i macniejšuju reakcyju na niebiaśpieku.
Kali hetyja vysnovy paćvierdziacca ŭ dalejšych daśledavańniach, heta budzie aznačać, što strach moža «pieradavacca», a latučyja rečyvy ŭ čałaviečym pocie słužać dla žyvioł sihnałam mahčymaj pahrozy. Navukoŭcy padkreślivajuć, što heta jašče adno śviedčańnie taho, što emacyjnyja sihnały mohuć pieraadolvać miežy pamiž roznymi vidami.
Pra što maŭčyć Alaksiej Franckievič, jakomu Polšča zakryła ŭjezd na 10 hadoŭ67
Kamientary