Прыйшла ў банк, каб перавесці 20 тысяч рублёў на замежны рахунак, але супрацоўнікі выклікалі міліцыю
У Мінску прадухілілі спробу выкрадання грошай у дзвюх маладых дзяўчат, адна з якіх — непаўналетняя. Злачынцы выкарысталі новую версію старой схемы і амаль выманілі ў дзвюх дзяўчат буйную суму грошай.
У міліцыю патэлефанавалі з банка і паведамілі пра падазроную аперацыю: узрушаная дзяўчына спрабавала перавесці каля 20 тысяч рублёў на замежны рахунак. На месца адразу выехала аператыўная група.
Як пазней патлумачыў начальнік аддзела крымінальнага вышуку Цэнтральнага РУУС Мінска Алег Бялькевіч, 19‑гадовай мінчанцы патэлефанаваў чалавек, які прадставіўся кур’ерам вядомага маркетплэйса, і паведаміў пра дастаўку тавару. Для пацвярджэння ён папрасіў дзяўчыну назваць код з СМС, які прыйшоў на яе тэлефон. Адразу пасля гэтага дзяўчыне патэлефанаваў яшчэ адзін мужчына — ужо нібыта супрацоўнік міліцыі.
Ён заявіў, што яна толькі што размаўляла з махлярамі, і прыгразіў ёй крымінальнай адказнасцю.
Паддаўшыся ціску, дзяўчына пагадзілася выконваць яго ўказанні і забрала з дому ўсе наяўныя грошы. Махляры таксама прымусілі пацярпелую сустрэцца з іншай ахвярай — 17‑гадовай дзяўчынай — і забраць у яе грошы бацькоў, каб пазней перадаць іх «кур’еру».
Дзякуючы пільнасці супрацоўнікаў банка, якія своечасова заўважылі падазроную аперацыю і выклікалі міліцыю, грошы ўдалося канфіскаваць да таго, як яны трапілі да злачынцаў. Сродкі вернуць законным уладальнікам. Па факце махлярства ўзбуджана крымінальная справа.
Цяпер чытаюць
У мінскім гандлёвым цэнтры Palazzo сабралася даўжэзная чарга. Па дармовых мядзведзікаў!5
Каментары