Чатырох чалавек асудзілі за супрацоўніцтва з «Байсолам». «Байсол» пракаментаваў
Мінскі гарадскі суд вынес прысуд чатыром жыхарам Мінска, якія, як сцвярджае следства, нібыта былі кур'ерамі Фонду салідарнасці Bysol. Ім інкрымінавалі ч. 3 арт. 361‑1 КК (удзел у экстрэмісцкім фармаванні). Таксама адной з фігурантак справы — жанчыне — дадаткова інкрымінавалі ч. 1 арт. 342 КК (актыўны ўдзел у дзеяннях, што груба парушаюць грамадскі парадак), піша «Вясна».
Паводле інфармацыі следства, фігуранты справы з'яўляліся кур'ерамі ініцыятывы Bysol — «у іх задачы ўваходзіла атрыманне і перадача грошай іншым удзельнікам фармавання, іх размеркаванне на патрэбы ўдзельнікаў незаконнай пратэснай і экстрэмісцкай дзейнасці».
Двум фігурантам справы прызначылі па 2 гады пазбаўлення волі, яшчэ аднаму — 3 гады. Жанчыне, якой дадаткова інкрымінавалі ўдзел у пратэстах, прызначылі 3 гады пазбаўлення волі. Таксама фігуранты справы павінны выплаціць па 500 базавых велічыняў штрафу.
Фонд «Байсол» пасля атрымання інфармацыі па гэтай справе выступіў з каментаром, сцвярджаючы, што інфармацыя пра сувязь асуджаных з Фондам насамрэч сумнеўная:
«Наша арганізацыя не карыстаецца кур'ерамі для перадачы грошаў унутры Беларусі. Мы робім усё, каб не падвяргаць людзей небяспецы. Тое, што у Мінску асудзілі чатырох чалавек, прыпісваючы ім ролю кур'ераў Bysol — прыклад пошуку палітычных ворагаў ды хлусні з боку сілавікоў. Гэтыя людзі асуджаныя несправядліва і з палітычных матываў. Яны ніколі не былі кур'ерамі Bysol, па простай прычыне — Bysol ніколі не меў кур'ерскай сеткі ў Беларусі».
Каментары