Čatyroch čałaviek asudzili za supracoŭnictva z «Bajsołam». «Bajsoł» prakamientavaŭ
Minski haradski sud vynies prysud čatyrom žycharam Minska, jakija, jak śćviardžaje śledstva, nibyta byli kurjerami Fondu salidarnaści Bysol. Im inkryminavali č. 3 art. 361‑1 KK (udzieł u ekstremisckim farmavańni). Taksama adnoj ź fihurantak spravy — žančynie — dadatkova inkryminavali č. 1 art. 342 KK (aktyŭny ŭdzieł u dziejańniach, što hruba parušajuć hramadski paradak), piša «Viasna».
Pavodle infarmacyi śledstva, fihuranty spravy źjaŭlalisia kurjerami inicyjatyvy Bysol — «u ich zadačy ŭvachodziła atrymańnie i pieradača hrošaj inšym udzielnikam farmavańnia, ich raźmierkavańnie na patreby ŭdzielnikaŭ niezakonnaj pratesnaj i ekstremisckaj dziejnaści».
Dvum fihurantam spravy pryznačyli pa 2 hady pazbaŭleńnia voli, jašče adnamu — 3 hady. Žančynie, jakoj dadatkova inkryminavali ŭdzieł u pratestach, pryznačyli 3 hady pazbaŭleńnia voli. Taksama fihuranty spravy pavinny vypłacić pa 500 bazavych vieličyniaŭ štrafu.
Fond «Bajsoł» paśla atrymańnia infarmacyi pa hetaj spravie vystupiŭ z kamientarom, śćviardžajučy, što infarmacyja pra suviaź asudžanych z Fondam nasamreč sumnieŭnaja:
«Naša arhanizacyja nie karystajecca kurjerami dla pieradačy hrošaŭ unutry Biełarusi. My robim usio, kab nie padviarhać ludziej niebiaśpiecy. Toje, što u Minsku asudzili čatyroch čałaviek, prypisvajučy im rolu kurjeraŭ Bysol — prykład pošuku palityčnych vorahaŭ dy chłuśni z boku siłavikoŭ. Hetyja ludzi asudžanyja niespraviadliva i z palityčnych matyvaŭ. Jany nikoli nie byli kurjerami Bysol, pa prostaj pryčynie — Bysol nikoli nie mieŭ kurjerskaj sietki ŭ Biełarusi».
Ciapier čytajuć
Zornaja biełaruskaja intelektuałka pajšła na realici ad TNT — budzie plaści intryhi, kab atrymać 100 tysiač jeŭra7
Kamientary