Памёр ганаровы грамадзянін Баранавічаў і былы дырэктар філіяла «Атланта»
Уладзімір Рашатко быў вядомым у Баранавічах чалавекам.
Памёр былы дырэктар Баранавіцкага станкабудаўнічага завода (філіял «Атланта»), ганаровы грамадзянін Баранавічаў Уладзімір Рашатко.
Ён нарадзіўся 22 кастрычніка 1951 года ў Баранавічах. У 1969 годзе пайшоў на завод жалезабетонных вырабаў будаўнічага трэста №25. Пасля службы ў арміі вярнуўся дадому і некаторы час працаваў слесарам-рамонтнікам на баваўняным камбінаце. У 1977 годзе скончыў Беларускі політэхнічны інстытут па спецыяльнасці «тэхналогія машынабудавання, металарэзныя станкі і інструменты» і быў накіраваны на Баранавіцкі завод аўтаматычных ліній. Прайшоў шлях ад майстра да начальніка цэха.
З 1 красавіка 1986 года быў прызначаны дырэктарам новага прадпрыемства ў Баранавічах — станкабудаўнічага завода. Яму Рашатко прысвяціў 28 гадоў.
За значны ўклад у павышэнне эфектыўнасці вытворчасці ў 1994 годзе Уладзіміру Рашатко прысвоена ганаровае званне «Заслужаны работнік прамысловасці Рэспублікі Беларусь». Дырэктар Баранавіцкага станкабудаўнічага завода атрымаў таксама ордэны Пашаны і Айчыны III ступені, названы «Чалавекам года» Баранавічаў у галіне прамысловасці.
Пры ім з’явіўся санаторый-прафілакторый «Чабарок», спартыўны комплекс «Атлант», новыя прадпрыемствы гандлю і грамадскага харчавання.
Жарсны аматар спорту, ён стварыў валейбольны клуб.
Уладзімір Рашатко быў удастоены таксама звання «Ганаровы грамадзянін горада Баранавічы».
Развітанне з ім адбудзецца 8 сакавіка, з 11 да 13.30, у храме Святога Аляксандра Неўскага.
Цяпер чытаюць
У Еўрасаюзе 550 тысяч беларусаў з дазволамі на жыхарства4
Каментары