Колькі беларусаў галасавала за Лукашэнку на ранейшых выбарах? Апублікаваныя закрытыя лічбы дзяржаўных апытанняў

Незалежная Беларуская сацыялагічная група прэзентавала даследаванне «Давер у эпоху перамен: электаральная гісторыя Беларусі (2001-2025)». Яго каштоўнасць у тым, што ўпершыню апублікаваныя вынікі закрытых даследаванняў, якія праводзіліся Інстытутам сацыялогіі Акадэміі навук Беларусі — аб даверы да Аляксандра Лукашэнкі і аб узроўні яго электаральнай падтрымкі.

Нагадаем, што дзяржаўныя сацыёлагі пастаянна праводзяць сацыялагічныя апытанні, якія вымяраюць «узровень даверу» да розных дзяржаўных органаў — напрыклад, судоў, міліцыі, войска. У тым ліку вымяраецца і давер да Аляксандра Лукашэнкі. Вынікі такіх даследаванняў не трапляюць у публічны доступ.

У склад Беларускай сацыялагічнай групы ўваходзіць Генадзь Коршунаў, які ў 2018‑2020 узначальваў Інстытут сацыялогіі. Таму зразумела, што ў яго маглі застацца архіўныя звесткі ўстановы.

Што варта разумець: перад Коршунавым — сумленным сацыёлагам, які быў вымушаны звольніцца ў верасні 2020 года — установу ўзначальвалі кадэбіст Георгій Явелькін (2000-2008) і зацяты камуніст Ігар Катляроў (2008-2018). Нельга выключаць, што яны маглі карэктаваць вынікі даследаванняў у больш выгадны для ўладаў бок. З іншага боку, калі вынікі такіх апытанняў не публікаваліся, то лукашэнкаўцы маглі быць зацікаўленыя ў атрыманні больш-менш рэалістычнага выніку, хай і з улікам узроўню страху ў грамадстве.

Чытайце: «70% мала, давайце 90%». Як Шпілеўская патрабавала ад Коршунава змяніць вынікі сацапытання

2001 год

На тых выбарах Цэнтрвыбаркам намаляваў Лукашэнку 76%, а ў адзінага кандыдата ад апазіцыі Уладзіміра Ганчарыка было 16%.

Падчас апытання Інстытута сацыялогіі 45% рэспандэнтаў сказалі, што прагаласавалі за Лукашэнку, 11% — за Ганчарыка. Апроч таго, амаль палова апытаных ухіліся ад адказу — 13% сказалі, што супраць усіх, а 30% «не мелі адказу».

2006 год

Паводле падлікаў Інстытута сацыялогіі, узровень даверу Лукашэнку складаў 50% (не ўказваецца, у якім месяцы праводзілася даследаванне).

Афіцыйныя падлікі Цэнтрвыбаркама: Лукашэнка — 83%, Мілінкевіч — 6%, Казулін — 2%.

А вось апытанне Інстытута сацыялогіі давала іншыя вынікі па галасах на выбарах: Лукашэнка — 63%, Мілінкевіч — 6%, Казулін — 1%. Аднак ізноў была зафіксаваная гіганцкая колькасць тых, хто не хоча адказваць дзяржаўным сацыёлагам — 26%. І яшчэ 3% былі супраць усіх.

2010 год

Падрабязныя дадзеныя за 2010 год ёсць толькі ў даследаванні НІСЭПД прафесара Алега Манаева, аднак даверу яму няма ніякага, таму і аналізаваць гэтыя звесткі няма сэнсу.

А вось узровень даверу Лукашэнку, па падліках Інстытута сацыялогіі, складаў 38%. Цікава, што праз год, у 2011 годзе, на фоне эканамічнага крызісу, ён апусціўся да 34%.

2015 год

Узровень даверу Лукашэнку ў гэтым годзе складаў 42%.

А вось падчас дзяржаўнага апытання наконт таго, за каго прагаласавалі Беларусі, былі зафіксаваныя незвычайныя вынікі.

Паводле перадвыбарчага апытання, за Лукашэнку збіраліся галасаваць 45%. Астатнія кандыдаты (уключна з Таццянай Караткевіч) мелі падтрымку на ўзроўні статыстычнай памылкі — ніжэй за 1%. Але ажно 52% адмовіліся адказваць на пытанне сацыёлагаў.

У выніку Цэнтрвыбаркам намаляваў Лукашэнку 84%.

2020 год

Чытайце: Афіцыйная сацыялогія: рэйтынг даверу Лукашэнку ў Мінску — 24%, Ярмошынай — 11%

Паводле вынікаў поствыбарчага дзяржаўнага апытання, за Аляксандра Лукашэнку прагаласавалі 21%, за Святлану Ціханоўскую — 33%. 11% заявілі, што не галасавалі, а яшчэ 26% не захацелі адказваць па пытанне.

Тым часам Лукашэнку намалявалі 80%, а Ціханоўскай — усяго 10%.

• 34
• 1
• 13
• 8
• 0
• 2
• 16
• 0