Вядомы дзіцячы сківічна-тваравы хірург цалкам адбыў шасцігадовы турэмны тэрмін.
Стала вядома пра вызваленне палітзняволенага доктара Андрэя Любецкага. Ён знаходзіўся за кратамі больш за пяць гадоў і выйшаў на свабоду па сканчэнні тэрміну.
***
Андрэй Любецкі нарадзіўся ў 1971 годзе ў Беразіне. З дзяцінства захапляўся футболам, падаваў надзеі і збіраўся стаць студэнтам інстытута фізкультуры. Але за тры месяцы да паступлення перадумаў і пайшоў у медыцынскі ўніверсітэт.
Пасля вучобы размеркаваўся ў 4‑ю дзіцячую бальніцу Мінска, дзе працаваў да 2016 года — амаль 18 гадоў. Любецкі праводзіў унікальныя аперацыі па пластыцы расколін паднябення і твару.
Сем гадоў Андрэй выкладаў у медінстытуце курс па дзіцячай хірургіі твару, дзе і пазнаёміўся са сваёй будучай жонкай. Пасля нараджэння чацвёртага дзіцяці ён перайшоў на працу ў прыватныя клінікі.
Пасля падзей жніўня 2020 года Андрэй Любецкі не застаўся ў баку. Ён стаў валанцёрам-медыкам у лагеры каля ізалятара на Акрэсціна, дзе аказваў дапамогу людзям, якія выходзілі са зняволення пасля жорсткіх збіццяў.
Доктар і сам правёў у ізалятары дзве ночы. Яго затрымалі 11 кастрычніка 2020 года пасля маршу.
У пачатку красавіка 2021 года на тэлеканале АНТ выйшаў фільм «Манкурты» пра былых сілавікоў. Адну з серый прысвяцілі сям’і Любецкіх. Яго аўтары абвінавацілі жонку Наталлю ў перадачы падстаўных «сакрэтных дакументаў» экс-алмазаўцу Ігару Макару. Пасля дзвюх начэй у следчым ізалятары яна прыняла рашэнне з’ехаць з краіны разам з дзецьмі. Андрэй заставаўся ў Беларусі.
Любецкі быў затрыманы 4 мая 2021 года. Суд нам ім адбыўся праз год па наступных артыкулах Крымінальнага кодэкса: ч. 1 арт. 342 (удзел у дзеяннях, якія груба парушаюць грамадскі парадак); ч. 1 арт. 130 (распальванне сацыяльнай варожасці); арт. 369 (абраза прадстаўніка ўлады); ч. 1 і ч. 2 арт. 368 (абраза Лукашэнкі).
У маі 2022 года суд вынес прысуд: пяць гадоў калоніі.
Суд таксама абавязаў мужчыну выплаціць 2000 рублёў у якасці кампенсацыі маральнай шкоды намесніку міністра ўнутраных спраў Мікалаю Карпянкову. Для адбыцця пакарання доктара накіравалі ў бабруйскую папраўчую калонію №2.
У чэрвені 2024 года Любецкага перавялі на турэмны рэжым і адправілі ў Жодзіна.
Незадоўга да плануемага вызвалення яму дадалі яшчэ год зняволення. Хутчэй за ўсё, вызваляўся доктар з калоніі для рэцыдывістаў у Горках.
Сківічны хірург Андрэй Любецкі валанцёрыў пад Акрэсціна, а яго жонка Наталля трапіла ў «шпіёнскі» фільм АНТ — вялікая гутарка
«Шчаслівы, што жонцы ўдалося з'ехаць. А я вытрымаю». Хірург Андрэй Любецкі даў інтэрв'ю з СІЗА
«Як прыстойны чалавек, я не магу маўчаць». Як судзяць хірурга Андрэя Любецкага
Палітвязня Андрэя Любецкага пераводзяць на турэмны рэжым
Цяпер чытаюць
Унікальныя здымкі будаўніцтва Старога моста ў Гродне. Хто фатаграфаваў небяспечныя кесоны, у якіх людзі рызыкавалі на дне Нёмана, каб паставіць апоры? ШМАТ ФОТА77
Каментары