Vyjšaŭ na svabodu vybitny chirurh Andrej Lubiecki

Stała viadoma pra vyzvaleńnie palitźniavolenaha doktara Andreja Lubieckaha. Jon znachodziŭsia za kratami bolš za piać hadoŭ i vyjšaŭ na svabodu pa skančeńni terminu.

***

Andrej Lubiecki naradziŭsia ŭ 1971 hodzie ŭ Bierazinie. Ź dziacinstva zachaplaŭsia futbołam, padavaŭ nadziei i źbiraŭsia stać studentam instytuta fizkultury. Ale za try miesiacy da pastupleńnia pieradumaŭ i pajšoŭ u miedycynski ŭniviersitet.

Paśla vučoby raźmierkavaŭsia ŭ 4‑iu dziciačuju balnicu Minska, dzie pracavaŭ da 2016 hoda — amal 18 hadoŭ. Lubiecki pravodziŭ unikalnyja apieracyi pa płastycy raskolin padniabieńnia i tvaru.

Siem hadoŭ Andrej vykładaŭ u miedinstytucie kurs pa dziciačaj chirurhii tvaru, dzie i paznajomiŭsia sa svajoj budučaj žonkaj. Paśla naradžeńnia čaćviortaha dziciaci jon pierajšoŭ na pracu ŭ pryvatnyja kliniki.

Paśla padziej žniŭnia 2020 hoda Andrej Lubiecki nie zastaŭsia ŭ baku. Jon staŭ vałancioram-miedykam u łahiery kala izalatara na Akreścina, dzie akazvaŭ dapamohu ludziam, jakija vychodzili sa źniavoleńnia paśla žorstkich źbićciaŭ.

Doktar i sam pravioŭ u izalatary dźvie nočy. Jaho zatrymali 11 kastryčnika 2020 hoda paśla maršu. 

U pačatku krasavika 2021 hoda na telekanale ANT vyjšaŭ film «Mankurty» pra byłych siłavikoŭ. Adnu ź sieryj pryśviacili siamji Lubieckich. Jaho aŭtary abvinavacili žonku Natallu ŭ pieradačy padstaŭnych «sakretnych dakumientaŭ» eks-ałmazaŭcu Iharu Makaru. Paśla dźviuch načej u śledčym izalatary jana pryniała rašeńnie źjechać z krainy razam ź dziećmi. Andrej zastavaŭsia ŭ Biełarusi.

Lubiecki byŭ zatrymany 4 maja 2021 hoda. Sud nam im adbyŭsia praz hod pa nastupnych artykułach Kryminalnaha kodeksa: č. 1 art. 342 (udzieł u dziejańniach, jakija hruba parušajuć hramadski paradak); č. 1 art. 130 (raspalvańnie sacyjalnaj varožaści); art. 369 (abraza pradstaŭnika ŭłady); č. 1 i č. 2 art. 368 (abraza Łukašenki).

U mai 2022 hoda sud vynies prysud: piać hadoŭ kałonii.

Sud taksama abaviazaŭ mužčynu vypłacić 2000 rubloŭ u jakaści kampiensacyi maralnaj škody namieśniku ministra ŭnutranych spraŭ Mikałaju Karpiankovu. Dla adbyćcia pakarańnia doktara nakiravali ŭ babrujskuju papraŭčuju kałoniju №2.

U červieni 2024 hoda Lubieckaha pieraviali na turemny režym i adpravili ŭ Žodzina.

Niezadoŭha da płanavanaha vyzvaleńnia jamu dadali jašče hod źniavoleńnia. Chutčej za ŭsio, vyzvalaŭsia doktar z kałonii dla recydyvistaŭ u Horkach.

Pavialičyć

• 53
• 1
• 1
• 4
• 0
• 5
• 1
• 12