У Афрыцы новая ўспышка ліхаманкі Эбола: 65 памерлых у ДР Конга, адзін смяротны выпадак ва Угандзе

Паводле звестак Афрыканскага цэнтра па кантролі і прафілактыцы захворванняў (Africa CDC), зарэгістравана каля 246 выпадкаў захворвання і 65 смерцяў, у асноўным у золатаздабыўных гарадах Монгвалу і Рвампара ва ўсходняй правінцыі Ітуры, піша Бі-бі-сі.

У пятніцу пра выпадак смерці ад віруса Эбола паведамілі ўлады Уганды. Міністэрства аховы здароўя краіны паведаміла, што ў 59‑гадовага мужчыны, які памёр у чацвер, тэст на вірус аказаўся станоўчым. Раней ён прыбыў у краіну з ДР Конга.

У лісце, распаўсюджаным Міністэрствам аховы здароўя Уганды, гаварылася, што 59‑гадовы грамадзянін ДР Конга быў шпіталізаваны ў бальніцу ў Кампале ў панядзелак і памёр у чацвер у аддзяленні інтэнсіўнай тэрапіі.

Чыноўнікі заявілі, што ва Угандзе пакуль не выяўлена ніводнага выпадку захворвання ўнутры краіны.

Гемарагічная ліхаманка Эбола была ўпершыню выяўлена ў 1976 годзе на тэрыторыі Заіра (цяпер ДР Конга). Лічыцца, што яна распаўсюдзілася ад лятучых мышэй. Гэта ўжо 17‑я ўспышка віруса Эбола ў краіне.

Захворванне распаўсюджваецца пры прамым кантакце з біялагічнымі вадкасцямі і праз пашкоджаную скуру, выклікаючы моцнае кровацячэнне і адмову ўнутраных органаў.

За першымі сімптомамі — ліхаманкай, цягліцавымі болямі, стомленасцю, галаўным болем і болем у горле — ідуць ваніты, дыярэя, сып і кровацячэнне.

Даказанага леку ад ліхаманкі Эбола не існуе. Паводле звестак Сусветнай арганізацыі аховы здароўя (СААЗ), сярэдні ўзровень смяротнасці складае каля 50%.

Папярэднія даследаванні, праведзеныя Нацыянальным інстытутам біямедыцынскіх даследаванняў (INRB) у сталіцы краіны, Кіншасе, выявілі вірус у 13 з 20 прааналізаваных узораў.

Цяпер праводзяцца тэсты для вызначэння штаму віруса.

Паводле звестак Афрыканскага цэнтра па кантролі і прафілактыцы захворванняў, з 65 смяротных выпадкаў чатыры былі зарэгістраваны сярод пацыентаў з лабараторна пацверджанымі захворваннямі.

Дадатковыя меркаваныя выпадкі захворвання таксама зарэгістраваны ў Буніа, сталіцы правінцыі Ітуры, вынікі лабараторных даследаванняў пакуль не пацверджаны.

У Афрыканскім цэнтры па кантролі і прафілактыцы захворванняў лічаць, што вірус можа распаўсюдзіцца і далей з-за шчыльнай забудовы ў гарадах Рвампара і Буніа.

Акрамя таго, выканаўчы дырэктар цэнтр Жан Касея дадаў, што цяпер неабходна садзейнічанне іншых дзяржаў. Паводле яго слоў, адбываецца «значнае перамяшчэнне насельніцтва» паміж пацярпелымі раёнамі і суседнімі краінамі.

Усім пацярпелым населеным пунктам і зонам рызыкі рэкамендавана прытрымлівацца ўказанняў нацыянальных органаў аховы здароўя.

У сваёй заяве ў пятніцу цэнтр па кантролі і прафілактыцы захворванняў адказаў, што склікае сустрэчу з уладамі ДР Конга, Уганды і Паўднёвага Судана, а таксама іншымі міжнароднымі партнёрамі для абмеркавання прыярытэтаў, уключаючы меры рэагавання і трансгранічны нагляд.

Сітуацыя ўскладняецца тым, што на працягу многіх гадоў ва ўсходніх раёнах ДР Конга ідуць баі паміж рознымі ўзброенымі групоўкамі. З 2021 года правінцыя Ітуры знаходзіцца пад ваенным кіраваннем. Улады ДР Конга такім чынам спрабуюць нейтралізаваць дзясяткі ўзброеных груповак, якія дзейнічалі ў гэтым раёне на працягу многіх гадоў. У прыватнасці, гэта джыхадзісцкая групоўка ADF (Саюзныя дэмакратычныя сілы).

За апошнія 50 гадоў у розных афрыканскіх краінах ад гэтага віруса памерла каля 15 000 чалавек.

Самая смяротная ўспышка эпідэміі ў ДР Конга адбылася ў перыяд з 2018 па 2020 год, у выніку якой загінула амаль 2300 чалавек.

У верасні мінулага года ў выніку ўспышкі захворвання ў аддаленым раёне Булапэ ў цэнтральнай правінцыі Касаі загінулі 45 чалавек. Гэта была першая ўспышка ў ДР Конга за тры гады. У канцы верасня Міжнародная федэрацыя таварыстваў Чырвонага Крыжа і Чырвонага Паўмесяца папярэджвала пра тое, што медыцынскія ўстановы краіны перагружаны, а запасы медыкаментаў вычэпваюцца.

• 0
• 0
• 0
• 0
• 0
• 0
• 0
• 0