U Afrycy novaja ŭspyška lichamanki Eboła: 65 pamierłych u DR Konha, adzin śmiarotny vypadak va Uhandzie

Pavodle źviestak Afrykanskaha centra pa kantroli i prafiłaktycy zachvorvańniaŭ (Africa CDC), zarehistravana kala 246 vypadkaŭ zachvorvańnia i 65 śmierciaŭ, u asnoŭnym u zołatazdabyŭnych haradach Monhvału i Rvampara va ŭschodniaj pravincyi Itury, piša Bi-bi-si.

U piatnicu pra vypadak śmierci ad virusa Eboła paviedamili ŭłady Uhandy. Ministerstva achovy zdaroŭja krainy paviedamiła, što ŭ 59‑hadovaha mužčyny, jaki pamior u čaćvier, test na virus akazaŭsia stanoŭčym. Raniej jon prybyŭ u krainu z DR Konha.

U liście, raspaŭsiudžanym Ministerstvam achovy zdaroŭja Uhandy, havaryłasia, što 59‑hadovy hramadzianin DR Konha byŭ špitalizavany ŭ balnicu ŭ Kampale ŭ paniadziełak i pamior u čaćvier u adździaleńni intensiŭnaj terapii.

Čynoŭniki zajavili, što va Uhandzie pakul nie vyjaŭlena nivodnaha vypadku zachvorvańnia ŭnutry krainy.

Hiemarahičnaja lichamanka Eboła była ŭpieršyniu vyjaŭlena ŭ 1976 hodzie na terytoryi Zaira (ciapier DR Konha). Ličycca, što jana raspaŭsiudziłasia ad latučych myšej. Heta ŭžo 17‑ia ŭspyška virusa Eboła ŭ krainie.

Zachvorvańnie raspaŭsiudžvajecca pry pramym kantakcie ź bijałahičnymi vadkaściami i praz paškodžanuju skuru, vyklikajučy mocnaje krovaciačeńnie i admovu ŭnutranych orhanaŭ.

Za pieršymi simptomami — lichamankaj, ciahlicavymi bolami, stomlenaściu, hałaŭnym bolem i bolem u horle — iduć vanity, dyjareja, syp i krovaciačeńnie.

Dakazanaha leku ad lichamanki Eboła nie isnuje. Pavodle źviestak Suśvietnaj arhanizacyi achovy zdaroŭja (SAAZ), siaredni ŭzrovień śmiarotnaści składaje kala 50%.

Papiarednija daśledavańni, praviedzienyja Nacyjanalnym instytutam bijamiedycynskich daśledavańniaŭ (INRB) u stalicy krainy, Kinšasie, vyjavili virus u 13 z 20 praanalizavanych uzoraŭ.

Ciapier pravodziacca testy dla vyznačeńnia štamu virusa.

Pavodle źviestak Afrykanskaha centra pa kantroli i prafiłaktycy zachvorvańniaŭ, z 65 śmiarotnych vypadkaŭ čatyry byli zarehistravany siarod pacyjentaŭ z łabaratorna paćvierdžanymi zachvorvańniami.

Dadatkovyja mierkavanyja vypadki zachvorvańnia taksama zarehistravany ŭ Bunia, stalicy pravincyi Itury, vyniki łabaratornych daśledavańniaŭ pakul nie paćvierdžany.

U Afrykanskim centry pa kantroli i prafiłaktycy zachvorvańniaŭ ličać, što virus moža raspaŭsiudzicca i dalej z-za ščylnaj zabudovy ŭ haradach Rvampara i Bunia.

Akramia taho, vykanaŭčy dyrektar centr Žan Kasieja dadaŭ, što ciapier nieabchodna sadziejničańnie inšych dziaržaŭ. Pavodle jaho słoŭ, adbyvajecca «značnaje pieramiaščeńnie nasielnictva» pamiž paciarpiełymi rajonami i susiednimi krainami.

Usim paciarpiełym nasielenym punktam i zonam ryzyki rekamiendavana prytrymlivacca ŭkazańniaŭ nacyjanalnych orhanaŭ achovy zdaroŭja.

U svajoj zajavie ŭ piatnicu centr pa kantroli i prafiłaktycy zachvorvańniaŭ adkazaŭ, što sklikaje sustreču z uładami DR Konha, Uhandy i Paŭdniovaha Sudana, a taksama inšymi mižnarodnymi partniorami dla abmierkavańnia pryjarytetaŭ, uklučajučy miery reahavańnia i transhraničny nahlad.

Situacyja ŭskładniajecca tym, što na praciahu mnohich hadoŭ va ŭschodnich rajonach DR Konha iduć bai pamiž roznymi ŭzbrojenymi hrupoŭkami. Z 2021 hoda pravincyja Itury znachodzicca pad vajennym kiravańniem. Ułady DR Konha takim čynam sprabujuć niejtralizavać dziasiatki ŭzbrojenych hrupovak, jakija dziejničali ŭ hetym rajonie na praciahu mnohich hadoŭ. U pryvatnaści, heta džychadzisckaja hrupoŭka ADF (Sajuznyja demakratyčnyja siły).

Za apošnija 50 hadoŭ u roznych afrykanskich krainach ad hetaha virusa pamierła kala 15 000 čałaviek.

Samaja śmiarotnaja ŭspyška epidemii ŭ DR Konha adbyłasia ŭ pieryjad z 2018 pa 2020 hod, u vyniku jakoj zahinuła amal 2300 čałaviek.

U vieraśni minułaha hoda ŭ vyniku ŭspyški zachvorvańnia ŭ addalenym rajonie Bułape ŭ centralnaj pravincyi Kasai zahinuli 45 čałaviek. Heta była pieršaja ŭspyška ŭ DR Konha za try hady. U kancy vieraśnia Mižnarodnaja fiederacyja tavarystvaŭ Čyrvonaha Kryža i Čyrvonaha Paŭmiesiaca papiaredžvała pra toje, što miedycynskija ŭstanovy krainy pierahružany, a zapasy miedykamientaŭ vyčepvajucca.

• 0
• 0
• 0
• 0
• 0
• 0
• 0
• 0